Qazaqstandyqtar óz qujattarynyń qoldanylý merziminiń aiaqtalǵany týraly SMS-habarlama alatyn bolady, - dep habarlaidy "Ult aqparat" polisia.kz saityna silteme jasap.
Ishki ister ministrligi Tsifrlyq damý, innovatsiialar jáne aeroǵarysh ónerkásibi ministrligimen birlesip, 1 sáýirden bastap jeke kýáliktiń nemese júrgizýshi kýáliginiń qoldanylý merziminiń aiaqtalýy týraly azamattardy uialy telefon nómirine SMS-habarlama arqyly aldyn ala habardar etý tetigi iske asyryldy.
Memleket basshysy Qazaqstan halqyna kezekti Joldaýynda: "Qazaqstan - áleýmettik memleket. Qiyn jaǵdaiǵa tap bolǵan azamattarǵa jan-jaqty kómek kórsetý - bizdiń basymdyqtarymyzdyń biri" degen edi.
Sondyqtan bul jańashyldyqty engizý eń aldymen, azamattardyń jeke basyn kýálandyratyn qujattardyń qoldanylý merziminiń aiaqtalýyna bailanysty ákimshilik quqyq buzýshylyqtardyń aldyn alýǵa, sondai-aq áleýmettik-ekonomikalyq turǵydan osal azamattarǵa qosymsha qarjylyq júktemeni azaitýǵa baǵyttalǵan (ákimshilik jaýapkershilikke tartýdy boldyrmaý maqsatynda).
Búgingi kúni jaramsyz jeke kýálik boiynsha 10 kúnnen 1 aiǵa deiin turǵany úshin eskertý túrinde ákimshilik jaýapkershilik, 1 aidan astam ýaqytqa 7 ailyq eseptik kórsetkish nemese 21 441 teńge mólsherinde aiyppul qarastyrylǵan (Qazaqstan Respýblikasy Ákimshilik quqyq buzýshylyq týraly kodeksiniń 492-baby).
Qoldanylý merziminiń aiaqtalýyna bailanysty ai saiyn jeke kýálikterdi aýystyrý úshin 77 myńǵa deiin azamat, osy sebeppen júrgizýshi kýálikterin aýystyrý úshin 35 myńǵa jýyq azamat júginedi. Ótken jyldyń ózinde júrgizýshi kýálikteriniń merzimi aiaqtalǵanyna bailanysty kýálikterdi aýystyrý úshin 915 myń adam jáne 400 myńnan astam azamat júgingen.
"Endi mobildik azamattar bazasynda (BMG) tirkelgen qazaqstandyqtar qujattyń qoldanylý merzimi aiaqtalǵanǵa deiin 30 kún buryn ózderiniń uialy telefonyna mynadai mazmundaǵy SMS-habarlama alatyn bolady: “Sizdin jeke kualiginizdin jaramdylyq merzimi 30 kunnen keiin aiaqtalady, HQKO-ga habarlasynyz/Srok Vashego udostovereniya istekaet cherez 30 dnei,obratites v CON", - delingen habarlamada.
Sondyqtan Memlekettik qyzmetterdi alý kezinde qandai da bir SMS-habarlamalardy alý úshin azamat "elektrondyq úkimet" portalyndaǵy "jeke kabinetinde" (eGov.kz) uialy telefon nómirin mindetti túrde kórsetýi kerek.
