قازاقستاندىقتار ٶز قۇجاتتارىنىڭ قولدانىلۋ مەرزٸمٸنٸڭ اياقتالعانى تۋرالى SMS-حابارلاما الاتىن بولادى, - دەپ حابارلايدى "ۇلت اقپارات" polisia.kz سايتىنا سٸلتەمە جاساپ.
ٸشكٸ ٸستەر مينيسترلٸگٸ تسيفرلىق دامۋ, يننوۆاتسييالار جەنە اەروعارىش ٶنەركەسٸبٸ مينيسترلٸگٸمەن بٸرلەسٸپ, 1 سەۋٸردەن باستاپ جەكە كۋەلٸكتٸڭ نەمەسە جٷرگٸزۋشٸ كۋەلٸگٸنٸڭ قولدانىلۋ مەرزٸمٸنٸڭ اياقتالۋى تۋرالى ازاماتتاردى ۇيالى تەلەفون نٶمٸرٸنە SMS-حابارلاما ارقىلى الدىن الا حاباردار ەتۋ تەتٸگٸ ٸسكە اسىرىلدى.
مەملەكەت باسشىسى قازاقستان حالقىنا كەزەكتٸ جولداۋىندا: "قازاقستان - ەلەۋمەتتٸك مەملەكەت. قيىن جاعدايعا تاپ بولعان ازاماتتارعا جان-جاقتى كٶمەك كٶرسەتۋ - بٸزدٸڭ باسىمدىقتارىمىزدىڭ بٸرٸ" دەگەن ەدٸ.
سوندىقتان بۇل جاڭاشىلدىقتى ەنگٸزۋ ەڭ الدىمەن, ازاماتتاردىڭ جەكە باسىن كۋەلاندىراتىن قۇجاتتاردىڭ قولدانىلۋ مەرزٸمٸنٸڭ اياقتالۋىنا بايلانىستى ەكٸمشٸلٸك قۇقىق بۇزۋشىلىقتاردىڭ الدىن الۋعا, سونداي-اق ەلەۋمەتتٸك-ەكونوميكالىق تۇرعىدان وسال ازاماتتارعا قوسىمشا قارجىلىق جٷكتەمەنٸ ازايتۋعا باعىتتالعان (ەكٸمشٸلٸك جاۋاپكەرشٸلٸككە تارتۋدى بولدىرماۋ ماقساتىندا).
بٷگٸنگٸ كٷنٸ جارامسىز جەكە كۋەلٸك بويىنشا 10 كٷننەن 1 ايعا دەيٸن تۇرعانى ٷشٸن ەسكەرتۋ تٷرٸندە ەكٸمشٸلٸك جاۋاپكەرشٸلٸك, 1 ايدان استام ۋاقىتقا 7 ايلىق ەسەپتٸك كٶرسەتكٸش نەمەسە 21 441 تەڭگە مٶلشەرٸندە ايىپپۇل قاراستىرىلعان (قازاقستان رەسپۋبليكاسى ەكٸمشٸلٸك قۇقىق بۇزۋشىلىق تۋرالى كودەكسٸنٸڭ 492-بابى).
قولدانىلۋ مەرزٸمٸنٸڭ اياقتالۋىنا بايلانىستى اي سايىن جەكە كۋەلٸكتەردٸ اۋىستىرۋ ٷشٸن 77 مىڭعا دەيٸن ازامات, وسى سەبەپپەن جٷرگٸزۋشٸ كۋەلٸكتەرٸن اۋىستىرۋ ٷشٸن 35 مىڭعا جۋىق ازامات جٷگٸنەدٸ. ٶتكەن جىلدىڭ ٶزٸندە جٷرگٸزۋشٸ كۋەلٸكتەرٸنٸڭ مەرزٸمٸ اياقتالعانىنا بايلانىستى كۋەلٸكتەردٸ اۋىستىرۋ ٷشٸن 915 مىڭ ادام جەنە 400 مىڭنان استام ازامات جٷگٸنگەن.
"ەندٸ موبيلدٸك ازاماتتار بازاسىندا (بمگ) تٸركەلگەن قازاقستاندىقتار قۇجاتتىڭ قولدانىلۋ مەرزٸمٸ اياقتالعانعا دەيٸن 30 كٷن بۇرىن ٶزدەرٸنٸڭ ۇيالى تەلەفونىنا مىناداي مازمۇنداعى SMS-حابارلاما الاتىن بولادى: “Sizdin jeke kualiginizdin jaramdylyq merzimi 30 kunnen keıin aıaqtalady, HQKO-ga habarlasynyz/Srok Vashego udostovereniya istekaet cherez 30 dnei,obratites v CON", - دەلٸنگەن حابارلامادا.
سوندىقتان مەملەكەتتٸك قىزمەتتەردٸ الۋ كەزٸندە قانداي دا بٸر SMS-حابارلامالاردى الۋ ٷشٸن ازامات "ەلەكتروندىق ٷكٸمەت" پورتالىنداعى "جەكە كابينەتٸندە" (eGov.kz) ۇيالى تەلەفون نٶمٸرٸن مٸندەتتٸ تٷردە كٶرسەتۋٸ كەرەك.
