Elbasy N.Á. Nazarbaevtyń Qazaqstan halqyna Joldaýynda berilgen tapsyrmalarǵa sáikes, «7-20-25» baǵdarlamasyna qatysýǵa niet bildirgen azamattardyń alǵashqy jarnasyn arzandatý úshin jalpy sany 50 myń danadan kem emes turǵyn úi sertifikattary shyǵarylatyn bolady. Qazaqstan halqyna ústimizdegi jyldyń aiaǵyna deiin 10 myńdai sertifikat tapsyrylmaq.
«7-20-25» sertifikattary biýdjettik sala qyzmetkerleri úshin alǵashqy jarnany edáýir jeńildetý maqsatynda ázirlenip otyr. Sertifikattardy qala jáne oblys ákimdikteri óz turǵyndary arasynda úlestiretin bolady.
«Elbasy jergilikti biýdjetten jeńildetilgen ipotekanyń alǵashqy jarnasyn sýbsidiialaý boiynsha jan-jaqty jumys júrgizýdi tapsyrdy. Memleket basshysy málimdegendei, mundai turǵyn úi sertifikattaryn berý muǵalimder, dárigerler, politsiia qyzmetkerleri jáne basqa da jergilikti óńirlerge qajetti mamandyq ieleri úshin ipotekanyń qoljetimdiligin arttyra túspek. Biz «Nur Otan» partiiasynyń qoldaýymen alǵashqy jarnany azaitý boiynsha jumystardy bastap kettik. Jáne atalǵan sharýany qyzý dóńgeletip, osy aptadan bastap ár óńirlerde «7-20-25» sertifikattaryn bere bastaimyz», - dedi, «Baspana» Ipotekalyq uiymynyń basshysy Qairat Altynbekov.
«7-20-25» sertifikatynyń ortasha nominaly 1 mln. teńgeni quraityn bolady. Demek, jergilikti atqarýshy organdar tarapynan «7-20-25» baǵdarlamasyna qatysýdy yntalandyrý úshin kem degende 50 mlrd. teńge bólinbek.
Esterińizde bolsa, qyrkúiek aiynda «7-20-25» baǵdarlamasy aiasynda alǵashqy jarnany arzandatý maqsatynda "Jas arman" men "Qamqor baspana" ónimderi ázirlenip, olar óńirlerde iske asyryla bastaǵan edi. Endi ónimder biriktirilip, alǵashqy jarnany azaitý boiynsha áleýmettik jumys «7-20-25» sertifikattary aiasynda keńinen júrgizilmek.
