QR Aqparat jáne kommýnikatsiialar ministri Dáýren Abaev BJZQ-nyń qazaqstandyqtardyń zeinetaqy qorynyń aýqymdy bóligin Ázerbaijan halyqaralyq bankine salýyna bailanysty máselege qatysty pikir bildirdi.
«Men ózderiniń zeinetaqy qory úshin ýaiymdap jatqan adamdardy jaqsy túsinemin. Qazirgi tańda tekseris júrip jatyr, onyń nátijesi jariialanatyn bolady. Qazaqstanda, tipti, infliatsiiany esepke ala otyryp, zeinetaqy qoryna memlekettik kepildik berilgen. Sondyqtan, elimizdegi zeinetke shyqqan barlyq azamattar zeinetaqy alatyn bolady. Buǵan esh kúmán keltirmeńizder, bul úshin ýaiymǵa salynýdyń qajeti joq. «Bul qarjylar durys investitsiialanǵan ba?» degen suraq - jiti baqylaýǵa alynǵan, qazir sáikesinshe tekseris júrip jatyr», - dep atap ótti ministr «Habar» telearnasyndaǵy «Dáýren Abaevpen ashyq dialog» baǵdarlamasynyń efirinde.
Eske salaiyq, Qazaqstannyń Biryńǵai jinaqtaýshy zeinetaqy qory 71,3 mlrd teńgelik aktivin investitsiialaǵan Ázerbaijan halyqaralyq banki sotqa bankrotqa ushyraǵany týraly ótinish bildirgen. Qarjy mekemesi syrtqy qaryzyn tóleýdi toqtatyp, kreditorlarmen qaita qurylymdaý týraly kelissózder júrgizýge daiyndalyp jatyr. Atalmysh qarjylyq másele Ázerbaijannyń ulttyq valiýtasynyń qunsyzdanýy men munai baǵasynyń turaqsyzdyǵy saldarynan týyndaǵan. Bank basshylyǵy bankrottyqty jariialaý arqyly kreditorlar tarapynan túsetin talap-aryzdan qutylýdy kózdep otyr.
Sonymen qatar, Ázerbaijan úkimeti banktiń qaryzdaryn tóleý týraly sheshim shyǵardy. Sondyqtan, sarapshylardyń aitýynsha, problemalyq bankke aqshasyn salǵan BJZQ-ǵa da, basqa kompaniialarǵa da eshqandai qaýip tónip turǵan joq.
