Qazaqstandyqtardyń zeinetaqy jinaqtary jyl basynan beri 879 mlrd teńgege ulǵaidy. Bul týraly Biryńǵai jinaqtaýshy zeinetaqy qory (BJZQ) málim etti, dep habarlaidy "Ult aqparat".
«BJZQ» AQ-nyń zeinetaqy aktivteri 2020 jyldyń birinshi toqsanynda 879 milliard teńgege ulǵaidy. Osylaisha azamattarymyzdyń zeinetaqy jinaqtary 11,7 trillion teńgeden asyp, 2020 jyldyń basynan bergi ósim 8% qurady.
Zeinetaqy jinaqtarynyń negizgi somasy mindetti zeinetaqy jarnalary (MZJ) esebinen qalyptasty jáne sońǵy 12 aida 21%-ǵa ulǵaiyp, 11,4 trln teńge boldy.
Aita keteiik, «BJZQ» AQ jarnalarynyń barlyq túrleri boiynsha jeke zeinetaqy shottarynyń jalpy sany 10 millionnan asty.
2020 jyldyń birinshi toqsanynda salymshylardyń shottaryna jalpy kólemi 261,9 mlrd teńge zeinetaqy jarnalary tústi, bul 2019 jyldyń alǵashqy 3 aiyndaǵy kórsetkishten 19% artyq. Tólemder 45 mlrd teńgeni qurady, olardyń basym bóligi jasy boiynsha (16,7 mlrd teńge), QR sheginen tys TTJ ketý boiynsha (11,6 mlrd teńge).
2020 jyldyń basynan bastap 1 sáýirge deiingi jaǵdai boiynsha BJZQ salymshylarynyń shottaryna 661,7 mlrd teńgeden astam investitsiialyq kiris esepteldi. Bul ótken jyldyń osy kezeńimen salystyrǵanda 564,8 mlrd teńgege artyq.
«Al 2019 jyldyń birinshi toqsanyndaǵy taza investitsiialyq tabys 96,9 mlrd teńge bolǵan edi. Bul rette investitsiialyq qyzmet nátijesinde shetel valiýtalary baǵamdarynyń qubylmalylyǵy jáne qarjy quraldarynyń naryqtyq qunynyń ózgerýi saldarynan eseptelgen investitsiialyq kiristiń mólsheri árqashan ózgerip turýy múmkin ekendigin jáne ony uzaq merzimdi perspektivada qaraý qajet ekenin este saqtaý mańyzdy. 2019 jáne 2020 jyldardaǵy kórsetkishterdi salystyryp qaraǵanda kórip otyrǵanymyzdai, investitsiialyq kiris – bul qarjy quraldarynyń qunyna jáne tutastai qarjy naryǵyndaǵy jaǵdaiǵa táýeldi, tirkelmegen shama. Sondyqtan jekelegen qarjy quraldary esebinen investitsiialyq kiris shamasynyń ýaqytsha tómendeý yqtimaldylyǵy bolashaqta zeinetaqy aktivteriniń barlyq investitsiialyq portfelin uzaq merzimde ártaraptandyrý esebinen óteletin bolady»,– dep atap ótti BJZQ.
