Zańda belgilengen shekke sai, qazaqstandyqtardyń ieligindegi shottardyń 100%-y Qazaqstannyń depozitterge kepildik berý qorynyń kepildiginde tur. Bul rette qazaqstandyq bankterdegi depozittik shottardyń 99,8%-y tolyq kólemde kepildikpen qorǵalǵan, dep habarlaidy QazAqparat.
«2022 jyly qańtarda teńgelik jinaq salymdar boiynsha kepildik berilgen maksimaldy ótem somasy 15 mln teńgeden 20 mln teńgege deiin ulǵaityldy. Sondai-aq bir bankte jinaq salymynan basqa depozitterdiń nemese shetel valiýtasynda depozitiniń basqa túri bar salymshylarǵa ótemaqynyń jalpy somasy 20 mln teńgege deiin kóbeitildi.
Teńgelik depozitterdiń anaǵurlym ikemdi túrleri, atap aitqanda, merzimdi jáne merzimsiz salymdar, aǵymdaǵy shottar men tólem kartochkalaryndaǵy aqshalar, sondai-aq shartty salymdar men talap etilmeli salymdar boiynsha 10 mln teńgege deiin kepildik berilgen», - dep habarlady Qordyń baspasóz qyzmeti.
Shetel valiýtasyndaǵy depozitterdiń kez kelgen túri boiynsha kepildik berilgen maksimaldy ótem somasy – valiýta balamasynda 5 mln teńge.
Birneshe bankte ornalasqan depozitter jeke-jeke kepildendiriledi. Bir bankte depozitterdiń birneshe túri men valiýtasy bar, sonyń ishinde teńgedegi jinaq salymy bar iri salymshylar úshin Qordyń jalpy eń joǵary kepildigi (depozittiń árbir túri úshin jeke belgilengen kepildik ótemaqynyń eń joǵary mólsheri sheginde) 20 mln teńge», - delingen habarlamada.
Qazirgi ýaqytta eki islam bankin eseptemegende, elimizdiń depozitterge kepildik berý júiesine qazaqstandyq ekinshi deńgeili 20 bank kiredi.
QDKBQ ótem tóleý úshin arnaiy rezervin únemi tolyqtyryp otyrady jáne kez kelgen sátte ózine mindettemeler qabyldaýǵa daiyn. Búginde QDKBQ-nyń arnaiy rezervinde onyń jarǵylyq kapitalynyń 70%-yn qosa eseptegende (ol ótem tóleýge paidalanylýy múmkin) 856 milliard teńge jinaqtalǵan. Jinaqtalǵan rezervtiń kólemi jeke tulǵalardyń depozittik bazasynyń shamamen 7%-yn quraidy. Bul zańnamada kózdelgen 5%-dyq deńgeiden joǵary.
Osylaisha qazaqstandyqtardyń jinaq aqshalary zańnamada belgilengen kepildik berilgen ótem somasy deńgeiinde tolyq qorǵalǵan.
Depozitter boiynsha kepildikter týraly tolyq aqparatty QDKBQ-nyń kdif.kz saitynan jáne bailanys ortalyǵynyń 1460 (qońyraý shalý tegin) qysqa nómirinen alýǵa bolady.
