Halyq arasynda júrgizilgen áleýmettik saýalnamaǵa sensek, otandastarymyzdyń 76,4 paiyzy Memleket basshysynyń referendým ótkizý týraly ideiasyn qoldaidy. Bul týraly QR Prezidenti janyndaǵy Qazaqstan strategiialyq zertteýler institýtynyń direktory Erkin Tuqymov málim etti, dep habarlaidy QazAqparat.
«Araǵa 22 jyl salyp jalpyhalyqtyq referendým ótkeli otyr. El úshin mańyzdy degen jaittar boiynsha Konstitýtsiiaǵa ózgerister engizý úshin daýys berýimiz kerek. Jańa Qazaqstandy qurý jolynda atalǵan sharanyń mańyzy zor. Osy oraida bizdi qoǵamnyń refrendým ótkizýge qatysty ne oilaityny qyzyqtyrady. Qazaqstandyqtar Konstitýtsiiaǵa engizilgeli otyrǵan ózgeristerdi qoldai ma? Qoldasa qandai deńgeide degen sekildi. Osy oraida Memleket basshysy referendým ótedi dep jariialaǵan kúnnen bastap bizdiń institýt jumysqa kirisip ketti», - dedi Erkin Tuqymov ortalyq kommýnikatsiialar qyzmeti alańynda sarapshylardyń qatysýymen ótken dóńgelek ústelde.
Institýt basshysynyń aitýynsha, 9-12 mamyr aralyǵynda halyq arasynda telefon arqyly saýalnama júrgizilgen.
«Áleýmettik saýalnamaǵa barlyq óńirden 1200 respondent qatysty. Onyń nátijesinde qazaqstandyqtardyń 66,4 paiyzy referendýmǵa qatysady. Osy tusta aita ketsek, zańǵa sáikes halyqtyń 50 paiyzdan astamy qatysqan jaǵdaida referendým ótken bolyp esepteledi. Jalpy atalǵan saýalnamanyń nátijesine sáikes, qazaqstandyqtardyń 70 paiyzy referendým ótetininen habardar. Sondai-aq, bizdiń institýt júrgizgen zertteýdiń nátijesi boiynsha Prezidenttiń referendým ótkizý týraly bastamasyn otandastarymyzdyń 76,4 paiyzy qoldap otyr. Iaǵni, qazaqstandyqtardyń deni referendým ótkizip, Konstitýtsiiaǵa tiisti ózgeristerdi engizýdiń mańyzdy ekenin túsinedi», - deidi ol.
Spiker usynǵan statistikaǵa sáikes, referendým ótkizý ideiasyn qazaqstandyqtardyń 15,4 paiyzy qoldamaidy. Sonymen qatar saýalnamaǵa qatysqan azamattardyń 8 paiyzy ázirge naqty sheshim qabyldamaǵan.
