QR Tsifrlyq damý, qorǵanys jáne aeroǵarysh ónerkásibi ministri Asqar Jumaǵaliev jańa pilottyq jobanyń iske qosylǵanyn jariia etti.
«Dostar, meniń mekenjai anyqtamasynan bas tartý qajettigi týraly jazǵanym esterińizde bolar. Bul máseleniń sheshimin taptyq, endi sizderden qoldaý kútemin. Mekenjai anyqtamasynyń qajettiligine kúmán keltirgen jazbamdy jariialaǵan soń, ózderińizden kóptegen usynys-pikirler kelip tústi. Bul anyqtamany birinshiden, memlekettik mekemeler jii talap etedi, áitse de olardyń suratýǵa quqyǵy joq. Ekinshiden, Eńbek kodeksinde mekenjai anyqtamasyn talap etý týraly baptyń joqtyǵyna qaramastan, jeke uiymdar da jii suratady», - dep jazady ministr Feisbýk paraqshasynda.
Asqar Jumaǵalievtiń jazýynsha, degenmen, mekenjai anyqtamasyn qajet dep sanaityndar da bar bolyp shyqqan. Olar atalǵan anyqtamanyń qajet ekenine túrli sebepterdi ýáj ete otyryp, óz kózqarastaryn bildirip jatyr.
«Biz ózderińizden kelip túsken barlyq usynys-tilekterdi eskerdik. Eger sizge azamattyń mekenjaiy týraly anyqtama qajet bolsa, azamatty sol úshin HQO-ǵa jumsamai, ony ózińiz-aq ala alasyz. Osy maqsatta pilottyq jobany iske qospaqpyz. Kadrlyq qyzmettiń qyzmetkeri nemese mekenjai anyqtamasyn suratýshylar azamattyń úshinshi bir tarapqa ruqsat bergeni týraly SMS habarlamany alysymen, «egov» portalyna kirip, ózderi anyqtamany júktep alady», - deidi ministr.
Ministrdiń habarlaýynsha, búgingi kúni 7 millionnan astam qazaqstandyq «mobildi azamat» bazasynda tirkelgen. Bul osynsha azamattyń SMS-habarlama arqyly úshinshi tarapqa mekenjai anyqtamasyn alýǵa ruqsat bere alatynyn ańǵartady. Al, qalǵan azamattarǵa HQO-ǵa baryp, óziniń telefon nómirin tirketýine týra keledi.
«Bul úshin birneshe minýt ýaqytyńyzdy jumsaǵanyńyzben, keiin birqatar artyqshylyqtarǵa qol jetkizesiz. Atap aitsaq, 25 servis pen anyqtamalardy ETsQ-syz telegramm qyzmeti arqyly alý múmkindigine ie bolasyz. Qurmetti mekenjai anyqtamasyn talap etýshiler! Jaqyn bolashaqta QR Ishki ister ministrligi jáne Memlekettik qyzmet isteri jáne sybailas jemqorlyqqa qarsy is-qimyl agenttigimen birlese otyryp, pilottyq jobany iske qosý kúnin belgileimiz. Osydan soń, azamattardan mekenjai anyqtamasyn talap etpei, ony úshinshi taraptyń servisi arqyly ózderińiz alatyn bolasyzdar. Kómek qajet bolsa, HQO qyzmetkerleri sizderge keńes berýge árqashan daiyn», - deidi ministr.
Eske sala ketsek, buǵan deiin Asqar Jumaǵaliev memlekettik organdardyń bazalaryn integratsiialaý arqyly anyqtamalardy barynsha qysqartý qajettigin aitqan bolatyn.
