Qazaqstandyqtar jyljymaityn múlikke quqyqtardy tirkeý merzimin buzǵany úshin aiyppul tólemeidi, dep habarlaidy "Ult aqparat".
«2021 jylǵy 26 qańtarda Memleket basshysy «Qazaqstan Respýblikasynyń keibir zańnamalyq aktilerine jyljymaityn múlikke quqyqtardy jáne zańdy tulǵalardy memlekettik tirkeý máseleleri boiynsha ózgerister men tolyqtyrýlar engizý týraly» Zańǵa qol qoidy. Zańmen jyljymaityn múlikke quqyqtardy tirkeý merzimin buzǵany úshin ákimshilik jaýapkershilik alynyp tastaldy. Eger buryn menshik iesi quqyqtardyń týyndaýyn tirkeýge ýaqtyly júginbegen jaǵdaida ákimshilik jaýapkershilikke tartylsa, qazir menshik iesi osyndai jaýapkershilikten bosatyldy. Mysaly, 2019 jyly 14 869 tulǵaǵa, 2020 jyly 9686 tulǵaǵa qatysty eskertýler shyǵaryldy», - delingen Ádilet ministrligi taratqan aqparatta.
Vedomstvo málimetinshe, bul normanyń qabyldanýy ózgergen jyljymaityn múlik iesi týraly quqyqtyq kadastrǵa ýaqtyly aqparat engizýge múmkindik beretin elektrondyq tirkeýdi sátti qoldaný sebep boldy. Osyǵan bailanysty jyljymaityn múlikti tirkeý salasyndaǵy ákimshilik jaýapkershilik týraly norma ózektiligin joǵaltty. Sondai-aq, qatysýshy jarǵylyq kapitaldaǵy úlesin ielikten shyǵarǵan kezde sharýashylyq seriktestikti qaita tirkeý úshin qajetti qujattar tizbesi belgilengen.
Jalpy alǵanda, Zań jyljymaityn múlikke jáne zańdy tulǵalarǵa quqyqtardy memlekettik tirkeý tártibin ońailatýǵa baǵyttalǵan.
