Áskeri mindettemesi bar qazaqstandyq otandastarymyzdyń densaýlyǵyn saqtaý qajettigi men tótenshe jaǵdai rejimin qamtamasy etý úshin shaqyrylǵaly otyr. Qorǵanys ministrligi áskeri mindettemesi bar azamattardy jergilikti eldi mekenderde patrýl jasaýǵa, sanitarlyq tazalaýǵa jáne kóktemgi sý tasqyny bolǵan jaǵdaida onyń saldaryn joiý jumystayna shaqyrady. Bul týraly QR Bas shtaby bastyǵynyń orynbasary Rýslan Shpekbaev málim etti, dep habarlaidy QazAqparat.
«Bizdiń Qarýly kúshter shoǵyrlanǵan óńirlerde kúsh bar. Al olar joq jerge meditsinalyq daiarlyǵy bar, qazir densaýlyq saqtaý salasyna tartylǵan azamattar shaqyrylady. Sonymen birge qyzmette tájiribesi bar mamandar blokpostarda, eldimekenderdi patrýldeýge jáne ol jerlerdi sanitarlyq turǵyda tazartýǵa jumyldyrylady. Bálkim, keibir aimaqta kóktemgi sý tasqynynyń saldaryn joiý protsesine kómektesedi», - dedi Rýslan Shpekbaev telefon arqyly aitqan sózinde.
Sonymen qatar, ol mundai tájiribe búkil aimaqta júrgiziletinin jetkizdi.
«Aimaqtarda áskerdiń jumysqa tartylǵanyn bilesizder. Biraq olar jetispeidi. Áskeri bólimder dislokatsiiasy joq oryndarǵa bálkim adamdardy tartamyz. Alaida bul rette adam sany, mindeti men merzimi boiynsha sheshimdi Bas shtabtyń kelisimimen ákimdik qabyldaidy», - dedi spiker.
QR Bas shtaby bastyǵynyń orynbasary sondai-aq bul jumysqa tartylý kezindegi tólem jaily da aityp ótti.
«Jumyssyz qalǵan azamattar minimaldy ailyq tólemaqyny alady. Jumysynan tartylǵan azamattar ailyq jalaqysyna ie bolady. Eń birinshi kezekte naqty aimaqtarǵa kerekti mamandardy iske tartamyz. Ár óńirde jaǵdai ártúrli. Iaǵni, adamdar tańerteń óz mindetin oryndaý úshin jumysqa kelgendei tártipte júredi. Turǵylyqty mekeni boiynsha barady. Keshke úilerine qaitady», - dedi Rýslan Shpekbaev.
Eske salsaq, Qazaqstan Prezidenti Qasym-Jomart Toqaev áskeri mindettilerdi arnaýly jiynǵa shaqyrý týraly Jarlyq shyǵarǵan bolatyn.
