Elordada túrmede jazasyn ótep jatqan azamat qylmystyq top quryp, qazaqstandyqtarǵa áleýmettik baspanaǵa qol jetkizýge ýáde etken. Sot ony jańa merzimge kesip, sybailastarynyń biri bolǵan – áielin bas bostandyǵynan aiyrdy, dep habarlaidy "Ult aqparat".
Elorda sotynyń aqparatyna sáikes, azamat S. 2017 jyly alaiaqtyq jasap túrmege túsken. Ol sol mekemede jazasyn ótep jatqan ózge adamdarmen birge sóz bailasyp, qylmystyq top qurǵan. Ári bul topqa bostandyqtaǵy jubaiyn tartqan.
Ol áieline «Kreditnoe tovarishestvo «Jilsotskredit» JShS atty seriktestik qurǵyzyp, ózge sybailastarynyń birin álgi seriktestikke quryltaishy, taǵy birin azamattarǵa kompaniia qyzmetin túsindiretin menedjer etken.
«Kompaniia zańdy qyzmet júrgizetinine sendirý úshin turǵyndardyń áleýmettik álsiz býynyna tiimdi sharttarmen nesie beretin tartymdy baǵdarlamalar ázirlegen. 2017 jyldan 2018 jylǵa deiin atalǵan tulǵalar Qazaqstannyń túrli óńirlerindegi sengish azamattardy jalǵan kompaniiaǵa 124 560 teńge mólsherinde jarna salýǵa kóndirgen, olarmen túrli somalarda «depozitke» aqsha salýǵa shart jasasqan. Azamattar alaiaqtardyń áleýmettik nesie baǵdarlamasyna senip, aqsha salǵan. Al kompaniia olardy yntalandyrý úshin keibirine depozittik salymdary boiynsha azdap syiaqy berip otyrǵan», - delingen sot habarlamasynda.
Alaiaqtardyń tuzaǵyna uzyn-yrǵasy 200-den astam azamat ilinip, jalpy 80 million teńgeden astam qarjy quiǵan.
«Nur-Sultan qalasy, Almaty aýdandyq №2 sotynyń úkimimen azamat S. 13 jylǵa bas bostandyǵynan aiyryldy. Qylmystyq istiń qalǵan figýranttary 6 jyldan 7 jylǵa deiin merzimderge kesildi. Úkim zańdy kúshine engen joq», - dedi qalalyq sottan.
