Qazaqstandyqtar satyp alatyn kóliktiń árbir ekinshisi otandyq óndiriste qurastyrylǵan. Bul týraly Qazaqstan mashina jasaýshylarynyń VIII forýmynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Búginde satyp alynǵan kóliktiń árbir ekinshisi otandyq óndiriste qurastyrylǵan kólik sanalady. Bul birlesken jemisti jumystyń tamasha kórsetkishi. Buǵan qosa, qazaqstandyq avtoónerkásip ónimderi eksporttyq naryqqa da shyǵyp otyr. Osy jyldyń 8 aiynda ǵana elimizde 341,2 mlrd teńge somaǵa 45 myń avtomobil shyǵaryldy. Onyń 4,7 myńnan astamy Resei, Belarýs jáne Ózbekstanǵa eksporttaldy. Mundai kórsetkishke ishki ósim rezervin yntalandyrýdyń arqasynda qol jetkizildi», - dedi ministr.
Onyń atap ótýinshe, qazirgi ýaqytta jeńildetilgen avtokredit pen jeńildetilgen lizing baǵdarlamasy jumys istep otyr. Atalǵan baǵdarlama aiasynda 5 jylǵa 50 mlrd teńge bólindi. Bul qarajat otandyq kásiporyndarǵa 98,6 mlrd teńge somaǵa 19 myń kólik quralyn qurastyrýǵa múmkindik berdi.
«Halyq tarapynan týyndyǵa úlken suranysty qanaǵattandyrý úshin ótken jyly Ulttyq bank jeńildetilgen avtokredit baǵdarlamasyn iske qosyp, onyń aiasynda 5 jylǵa, iaǵni jyl saiyn 20 mlrd teńgeden taǵy 100 mlrd teńge bólindi. Atalǵan baǵdarlama aiasynda qazirdiń ózinde 40 mlrd teńge somaǵa 7,1 myń avtomobil satyldy», - dedi Beibit Atamqulov.
Buǵan qosa, ministrdiń aitýynsha, 2018-2020 jyldary eskirgen avtobýs parkin jańartý baǵdarlamasy aiasynda 33,5 mlrd teńge bólindi. Bul qarajat elimizdiń óńirlerine 1 350 avtobýs satyp alýǵa múmkindik berdi. Biyl qosymsha 10 mlrd teńge bólinip otyr.
