Budan bylai el turǵyndaryna múlik, jer jáne kólik quraldaryna qatysty salyq tólemderi SMS-habarlama arqyly keledi. Bul týraly QR Qarjy ministrliginiń baspasóz qyzmeti habarlady.
Atalǵan joba «Salyqtyq ákimshiliktendirý júiesin reformalaý» jobasy aiasynda júzege asýda. «SMS-taratý» qyzmeti jeke tulǵalardyń 2018 jylǵy salyq mindettemelerin ýaqtyly bilý maqsatynda pilottyq rejimde iske qosyldy.
«Jaqynda Qazaqstan Respýblikasy azamattarynyń uialy telefonyna salyq jónindegi aqparat SMS-habarlamalar arqyly keletin bolady. Habarlamany alý úshin Elektrondy úkimet portalyna (egov.kz) nemese mgov mobildi qosymshasy arqyly azamattardyń mobildi bazasyna tirkelý qajet» delingen baspasóz habarlamasynda.
SMS-habarlamanyń tiimdi tusy – jeke tulǵalarǵa salyq mindettemelerin jedel túrde jetkizip, aqparattyń qoljetimdiligin qamtamasyz etý. Basty maqsat – salyq jinaý tiimdiligin arttyryp, jyldam ári sapaly qyzmet usyný.
«Habarlamalardy qaǵaz túrinde berý kóp shyǵyndy talap etedi. Sol sebepti, Qazaqstan Respýblikasy Qarjy minstrligi Estoniia tájiribesin eskere otyryp, qaǵaz habarlamalardy joiý maqsatynda zańǵa ózgerister men tolyqtyrýlar engizý boiynsha jumys júrgizip jatyr», – deidi QR Qarjy ministrligi ókilderi.
Jeke tulǵalar kez kelgen yńǵaily jolmen salyq tólei alady. Naqtyraq aitsaq, ekinshi deńgeidegi bank bólimshelerinde nemese tólem terminaldarynda qolma-qol aqshamen, bank kartalaryn qoldana otyryp bankomattar arqyly, sondai-aq Memlekettik kirister departamentiniń saityndaǵy elektrondy qyzmetterdi paidalana otyryp salyq tóleý múmkindikteri qarastyrylǵan. Qosymsha suraqtar boiynsha 1414 tegin telefon nomeri arqyly biryńǵai bailanys-ortalyǵyna habarlasýǵa bolady.
Atalǵan tólemderdi esepteý kezinde Qazaqstan Respýblikasy Aýyl sharýashylyǵy ministrligi Jer resýrstaryn basqarý komitetiniń «Memlekettik jer kadastry» aqparattyq júiesi men Qazaqstan Respýblikasy Ádilet ministrliginiń «Jyljymaityn múlik tirkelimi» memlekettik aqparattyq júiesiniń derekteri paidalanylǵan.
Sonymen qatar, 2019 jyldyń 1 qazanyna deiin tólenýi tiis 2018 jylǵy salyqtar somasy týraly habarlamalar qaǵaz túrinde de poshta arqyly jiberiletin bolady.
