Qazaqstan halqy ózderiniń áleýmettik jaǵdaiyna qanshalyqty qanaǵattanady? Qai óńir turǵyndary azyq-túlik pen basqa taýarlardyń baǵasyna qanaǵattanbaidy? Osy jáne ózge de áleýmettik saýaldar nátijesi jóninde QR Prezidenti janyndaǵy Qazaqstan strategiialyq zertteýler institýty áleýmettik zertteýler bóliminiń basshysy Janna Kárimova málim etti, dep habarlaidy QazAqparat.
«Áleýmettik zertteý monitoringine qatysqan 6800 respondenttiń 60,4 paiyzy qala turǵyndary, qalǵan 39,6 paiyzy aýyl turǵyndary. Ondaǵy áielderdiń úlesi – 44,6 paiyz, al erlerdiń úlesi – 55,4 paiyz.
Respondentterdiń 65,5 paiyzy taýarlar men azyq-túliktiń baǵasyna, 53,2 paiyzy turatyn jeriniń ekologiialyq ahýalyna, 51,7 paiyzy joldyń sapasyna, 45,6 paiyzy meditsina sapasyna, 44,7 paiyzy jeke tabys kólemine, 39,9 paiyzy qoǵamdyq kólik qyzmetine, 38,7 paiyzy bilim berýge jáne 34 paiyzy óz jumysyna qanaǵattanarlyqsyz degen baǵa berdi», - dedi Janna Kárimova áleýmettik monitoring nátijesin tanystyra otyryp.
Onyń aitýynsha, halyqtyń oiyn bilý sharasy 2 baǵytta júrgizildi. Biri azamattardan jeke suhbat alý arqyly, ekinshi joly kóshege shyǵyp halyqtyń pikirin suraý jolymen.
«Eldegi sońǵy 9 ai ishindegi áleýmettik ózgeristerge zer salatyn bolsaq. Barlyq pozitsiialar boiynsha qanaǵattanbaýshylyqtyń artqany baiqalady. 2021 jyldyń maýsym aiymen salystyrǵanda baǵanyń ósýine qanaǵattanbaý kórsetkishi 4,4 paiyzǵa, meditsinalyq qyzmet sapasyna qanaǵattanbaýshylyq 7, 5 paiyzǵa, ekologiialyq ahýalǵa qanaǵattanbaý 13,1 paiyzǵa artqan. Monitoring nátijesinde azyq-túlik jáne taýarlardyń baǵasyna ásirese BQO (86,6%), Aqmola oblysy (81,8%) jáne Atyraý oblysynyń (78,9%) jurty alańdatýshylyq tanytty», - deidi ol.
