Qazaqstandyqtar budan bylai tanymal messendjerler arqyly birqatar qajetti anyqtama ala alady. Bul týraly «Ulttyq aqparattyq tehnologiialar» AQ basqarma tóraǵasy Áset Turysov málim etti, dep habarlaidy QazAqparat tilshisi.
«Kórip otyrǵanymyzdai, áleýmettik jeliler kúndelikti ómirimizdiń bir bóligine ainalyp ketti. Mine, osy jaidy eskere otyryp, memlekettik qyzmet alýdyń qosymsha yńǵaily servisterin iske qosýdy jón dep sheshtik. Qyrkúiekte synaq túrinde chat-bottardy iske qosqan edik. Qazir paidalanýshylardyń kúnnen-kúnge artyp kele jatqanyn baqylap otyrmyz. Búgingi kúni Telegram-bot arqyly 20 memlekettik qyzmetti alýǵa bolady. Sol sekildi, «VKontakte» arqyly 19, «Facebook» arqyly 15 memlekettik qyzmettiń túri qoljetimdi. Jazylǵan pikirlerdi eskere otyryp, qyzmet túrin arttyrǵan abzal dep otyrmyz», - dedi Áset Turysov elordadaǵy «Tsifrlyq kúzdiń» tanystyrylýynda.
Osydan keiin Á.Turysov chat-bottardyń qalai jumys isteitinin túsindirip berdi.
Aitýynsha, aldymen áleýmettik jelini paidalanýshy tiisti habarlamany jiberedi. Al aqyldy júie adamdardyń qatysýynsyz operatorlarǵa kelgen qyzmetterdi teń bólip beredi. Iaǵni, tiisti nómir alyp, atqarýshy avtomatty túrde taǵaiyndalady. Mundai júie jumys barysyn tiimdi basqarýǵa múmkindik beredi. Paidalanýshyǵa suraýyn oryndaýshylardyń aty-jóni men bailanys nómiri týraly habarlama túsedi. Osylaisha, paidalanýshy virtýaldy keńesshimen sóilese otyryp, belgili bir memlekettik qyzmetti ala alady.
Eske sala ketsek, búgingi «Tsifrlyq kúzde» QR Tsifrlyq damý, innovatsiialar jáne aeroǵarysh óndirisi ministri Asqar Jumaǵaliev eGov-tyń jańartylǵan mobildi qosymshasy iske qosylatynyn málim etken edi.
Sonymen birge, «Azamattarǵa arnalǵan úkimet» memlekettik korporatsiia basqarmasynyń tóraǵasy Ásemgúl Baltasheva mekenjai anyqtamasynan bólek taǵy 28 anyqtamanyń da joiylatynyn jariialady.
