Densaýlyq saqtaý ministrligi Qazaqstanda koronavirýs infektsiiasynyń taralýyna bailanysty oblystardy úsh topqa bólip, monitoring júrgizýde, dep habarlaidy "Ult aqparat".
«Búgingi tańǵa deiin Qazaqstan boiynsha 8531 syrqat anyqtaldy. Olardyń 3118-i ary qarai emin infektsiialyq klinikalarda jalǵastyrýda. Jalpy 4400 adam emdelip, úilerine qaitaryldy. Iaǵni jartysynan kóbi emdelip, úiilerine qaitty. Ótken táýlik boiynsha infektsiiany juqtyrǵan 209 adam tirkeldi. Ósý deńgeii – 2,5 paiyz. Jalpy ótken aptamen salystyrǵanda 2091 naýqas anyqtalyp, ósý deńgeii 2,2-5,2 paiyz deńgeiinde saqtalyp otyr», - dedi QR DSM taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Timýr Sultanǵaziev Densaýlyq saqtaý ministrliginiń Facebook-ktegi paraqshasynda.
Onyń aitýynsha, ótken aptada koronavirýs juqtyrǵan azamattardyń 80 paiyzy nemese 1689 naýqas belsendi túrde júrgizilgen skrining barysynda anyqtalǵan.
«Keibir óńirde koronavirýs juqtyrǵandardyń sany aitarlyqtai artyp keledi. Aimaqtardy ósim boiynsha birneshe topqa bólip otyrmyz. Birinshi topqa juqtyrý ósimi 7 paiyzdy quraityn óńirler kiredi. Mundai ósim Almaty, Jambyl, Qaraǵandy, Qostanai, Túrkistan, Soltústik Qazaqstan oblystary men Shymkent qalasynda baiqaldy. Ekinshi toptaǵy ósim kórsetkishi 5-7 paiyz aralyǵyn kórsetip otyrǵan oblystarǵa Aqmola, Aqtóbe men Nur-Sultan qalasy enedi. Úshinshi topqa ósim kórsetkishi 5 paiyzdan tómen aimaqtar kiredi. Olar: ShQO, BQO, Qyzylorda, Mańǵystaý, Pavlodar oblysy men Almaty qalasy», - dedi ol.
Komitet basshysy aimaqtarda koronavirýs infektsiiasyn juqtyrǵandardyń kóbi iri kásiporyndarda tirkelip jatqanyn aityp ótti.
«Máselen olardyń ishinde Shymkenttegi «Petro Qazaqstan» nemese Qaraǵandy oblysyndaǵy «Qazaqmys» nysandary bar. Atyraýdaǵy «Teńizshevroilda» da sondai jaǵdai. Azamattardyń jumysqa shyǵýyna, ekinshi jaǵynan karantin tártibiniń álsireýine bailanysty bizde juqtyrý jaǵdaiy artyp barady», - dedi ol.
