دەنساۋلىق ساقتاۋ مينيسترلٸگٸ قازاقستاندا كوروناۆيرۋس ينفەكتسيياسىنىڭ تارالۋىنا بايلانىستى وبلىستاردى ٷش توپقا بٶلٸپ, مونيتورينگ جٷرگٸزۋدە, دەپ حابارلايدى "ۇلت اقپارات".
«بٷگٸنگٸ تاڭعا دەيٸن قازاقستان بويىنشا 8531 سىرقات انىقتالدى. ولاردىڭ 3118-ٸ ارى قاراي ەمٸن ينفەكتسييالىق كلينيكالاردا جالعاستىرۋدا. جالپى 4400 ادام ەمدەلٸپ, ٷيلەرٸنە قايتارىلدى. ياعني جارتىسىنان كٶبٸ ەمدەلٸپ, ٷيٸلەرٸنە قايتتى. ٶتكەن تەۋلٸك بويىنشا ينفەكتسييانى جۇقتىرعان 209 ادام تٸركەلدٸ. ٶسۋ دەڭگەيٸ – 2,5 پايىز. جالپى ٶتكەن اپتامەن سالىستىرعاندا 2091 ناۋقاس انىقتالىپ, ٶسۋ دەڭگەيٸ 2,2-5,2 پايىز دەڭگەيٸندە ساقتالىپ وتىر», - دەدٸ قر دسم تاۋارلار مەن كٶرسەتٸلەتٸن قىزمەتتەردٸڭ ساپاسى مەن قاۋٸپسٸزدٸگٸن باقىلاۋ كوميتەتٸنٸڭ تٶراعاسى تيمۋر سۇلتانعازيەۆ دەنساۋلىق ساقتاۋ مينيسترلٸگٸنٸڭ Facebook-كتەگٸ پاراقشاسىندا.
ونىڭ ايتۋىنشا, ٶتكەن اپتادا كوروناۆيرۋس جۇقتىرعان ازاماتتاردىڭ 80 پايىزى نەمەسە 1689 ناۋقاس بەلسەندٸ تٷردە جٷرگٸزٸلگەن سكرينينگ بارىسىندا انىقتالعان.
«كەيبٸر ٶڭٸردە كوروناۆيرۋس جۇقتىرعانداردىڭ سانى ايتارلىقتاي ارتىپ كەلەدٸ. ايماقتاردى ٶسٸم بويىنشا بٸرنەشە توپقا بٶلٸپ وتىرمىز. بٸرٸنشٸ توپقا جۇقتىرۋ ٶسٸمٸ 7 پايىزدى قۇرايتىن ٶڭٸرلەر كٸرەدٸ. مۇنداي ٶسٸم الماتى, جامبىل, قاراعاندى, قوستاناي, تٷركٸستان, سولتٷستٸك قازاقستان وبلىستارى مەن شىمكەنت قالاسىندا بايقالدى. ەكٸنشٸ توپتاعى ٶسٸم كٶرسەتكٸشٸ 5-7 پايىز ارالىعىن كٶرسەتٸپ وتىرعان وبلىستارعا اقمولا, اقتٶبە مەن نۇر-سۇلتان قالاسى ەنەدٸ. ٷشٸنشٸ توپقا ٶسٸم كٶرسەتكٸشٸ 5 پايىزدان تٶمەن ايماقتار كٸرەدٸ. ولار: شقو, بقو, قىزىلوردا, ماڭعىستاۋ, پاۆلودار وبلىسى مەن الماتى قالاسى», - دەدٸ ول.
كوميتەت باسشىسى ايماقتاردا كوروناۆيرۋس ينفەكتسيياسىن جۇقتىرعانداردىڭ كٶبٸ ٸرٸ كەسٸپورىنداردا تٸركەلٸپ جاتقانىن ايتىپ ٶتتٸ.
«مەسەلەن ولاردىڭ ٸشٸندە شىمكەنتتەگٸ «پەترو قازاقستان» نەمەسە قاراعاندى وبلىسىنداعى «قازاقمىس» نىساندارى بار. اتىراۋداعى «تەڭٸزشەۆرويلدا» دا سونداي جاعداي. ازاماتتاردىڭ جۇمىسقا شىعۋىنا, ەكٸنشٸ جاعىنان كارانتين تەرتٸبٸنٸڭ ەلسٸرەۋٸنە بايلانىستى بٸزدە جۇقتىرۋ جاعدايى ارتىپ بارادى», - دەدٸ ول.
