Ekonomikalyq zertteý institýtynyń áleýmettik-demografiialyq damýdy zertteý ortalyǵynyń direktory Batjan Aqmoldina qazaqstandyq qoǵamdaǵy demografiialyq tendentsiia týraly aityp berdi, dep habarlaidy QazAqparat tilshisi.
«Biz bala týý men ólim-jitimi joǵary kórsetkishke ie elden bala týý men ólim-jitimi tómen kórsetkishke ie elge ainalyp kelemiz. Bul demografiialyq aýysym dep atalady. Damyǵan elder 50-60 jyl buryn basyp ketken álemdik tendentsiia bizdiń elde jyl sanap aiqyn baiqalýda. Bizde dástúrli bala týý kórsetkishiniń tómendeýimen bul protsess anyq baiqalady. Saýalnama júrgizip, jastardan qansha balaly otbasy bolǵyń keledi dep suraǵanymyzda, jartysynan kóbi 2-3 bala dep jaýap beredi. Odan artyq bala tabýdy jón kórmeidi», - dedi ol Astanada ótken «Qazaqstandyq qoǵamdy jańǵyrtý protsesindegi otbasynyń róli» atty dóńgelek ústel otyrysynyń aldynda.
Sarapshynyń aitýynsha, buǵan áleýmettik-ekonomikalyq faktorlar sebep bolyp otyr.
«Adamdarǵa: «Bala sanyn josparlaý kezinde materialdyq jaǵdai esepke alynýy kerek pe?» degen suraq qoiyldy. Saýalnamaǵa qatysýshylardyń 83 paiyzy bul suraqqa «iá» dep jaýap berip otyr. Demek, biz dástúrli qalyptan aýytqyp baramyz. Biz dástúrdi ustanǵan aziialyq memleket bolǵanymyzǵa qaramastan, demografiialyq aýysymnyń tendentsiiasy bizde aiqyn baiqalyp keledi», - deidi ol.
Batjan Aqmoldina sonymen qatar, Qazaqstanda jastardyń ajyrasý jaǵdaiy kórshiles elderden qaraǵanda kóp ekenin atap ótti.
«TMD elderiniń ishinde Ózbekstan, Tájikstan sekildi memleketterdei nekege turý kórsetkishi bizde joǵary bolǵanymen, ol eldermen salystyrǵanda Qazaqstanda ajyrasý jaǵdaiy kóp kezdesedi. Demek, bizde otbasy institýty dástúrden tys tegeýrinderge tap bolǵan. Ajyrasý jaǵdailarynyń kóp bolǵany - demografiialyq aýysymǵa da ózindik áserin tigizip jatyr», - deidi ol.
