Sý resýrstary jáne irrigatsiia ministri Nurjan Nurjigitov biyl 11 aqpannan bastap sýdy únemdi tutyný maqsatynda limitti 4 deńgeili tarifpen belgileý engiziletinin málimdedi. Bul týraly "Ult aqparat" Stan.kz aqparat agenttigine silteme jasai otyryp habarlaidy.
Ministr májiliste ótken "Respýblikadaǵy sarqyndy sýlardy qaita paidalanýdyń problemalary men perspektivalary" atty dóńgelek ústelde baiandama jasady.
“Sýdy únemdeý úshin Ulttyq ekonomika ministrliginiń buiryǵymen 1 adamǵa shaqqandaǵy tutyný kóleminiń belgilengen normasy sheginde aýyz sý qyzmetterine tutyný kólemi boiynsha saralaý tetigi engizildi. Buiryq 11 aqpanda kúshine endi", – dedi ol.
Buiryqta sýdy tutyný limitin 4 deńgeili tarifpen belgileý qarastyrylǵan:
I top – aiyna 3 m3 deiin tutynýmen qoldanystaǵy tarif qoldanylady (halyqtyń 49% tutynady);
II top – aiyna 3-ten 5 m3-ke deiin tutynýmen, tarif qoldanystaǵy tariften +20%-ǵa joǵary (halyqtyń 20%-y tutynady);
III top – aiyna 5 m3-ten 10 m3-ke deiin tutynýmen, tarif qoldanystaǵy tariften +50%-ǵa joǵary (halyqtyń 20%-y tutynady);
IV top – aiyna 10 m3 astam tutynýmen, tarif qoldanystaǵy tariften 100%-ǵa nemese 2 esege joǵary (halyqtyń 11%-y tutynady).
Ministrdiń aitýynsha, joǵaryda atalǵan tásildi qoldaný Ulttyq ekonomika ministrligi derekteri boiynsha 13 milliard teńge qosymsha tabys ákeledi. Tabiǵi monopoliialar sýbektileri bul qarajatty jeliler men jabdyqtardy rekonstrýktsiialaý, jelilerdiń tozý deńgeiin tómendetý jáne shyǵyndardy azaitý baǵytyna jumsaidy.
