Foto: QR IIDM baspasóz qyzmeti
Qazaqstanda 4 paiyzdyq jeńildetilgen avtokredit baǵdarlamasy toqtatylady. Bul týraly Indýstriia jáne infraqurylymdyq damý ministri Marat Qarabaev málimdedi, dep habarlaidy Sputnik Qazaqstan.
Onyń aitýynsha, 4 paiyzdyq jeńildetilgen avtokredit baǵdarlamasyn qaita jańartý josparlanyp otyr.
"Qaita jańartý kezinde avtokólikti kreditteý baǵytyn avtobýstardy nesieleý baǵytyna aýystyramyz ba degen jospar bar. Elimizde qoǵamdyq kólikterdiń kóbi tozǵan. Mysaly Qostanaida avtobýstardyń 90 paiyzy, Oral, Taldyqorǵanda 70 paiyzy eskirgen. Biz baǵdarlama aiasynda túsken aqshaǵa qansha adam kólik ala alady, eger onyń ornyna avtobýstardy qarjylandyrsaq, tiimdiligi qalai, sonyń bárin eseptedik. Máselen, qoǵamdyq kólikterdi kúnine 9 mln 300 myń qazaqstandyq paidalanady eken. Sondyqtan biz aqshany kóbirek avtobýstar satyp alýǵa baǵyttaimyz dep otyrmyz", - dedi Qarabaev Aqorda kýlýarynda.
Aitýynsha, qarapaiym halyq naryqtyq stavkamen kólik ala alady.
"Ol jerde eki baǵdarlama bar ǵoi. Birinshisine kezeń-kezeńmen 82 mlrd teńge bólindi. Ol qazir revolverlik ádis boiynsha óz aldyna istep tur. 82 mlrd teńge boiynsha 10-15% bastapqy jarna, qatelespesem nesie mólsherlemesi 5% bolǵan. Bul baǵdarlama ári qarai jalǵasady. Biraq odan túsken aqshany qaida baǵyttaitynymyzdy qosymsha habarlaimyz", - dep túsindirdi Indýstriia ministri.
Al ekinshisi 4 paiyzdyq avtokredit boiynsha "Operator ROP-tan" bólingen 100 mlrd teńgeden túsken barlyq qarjy endi qoǵamdyq kólikterdi jańartýǵa jumsalady. Búginde bul baǵdarlama boiynsha 4 mlrd teńge jinalǵan.
"Qorytyndylai aitqanda, jalpy tórt paiyzdyq, 100 mlrd teńge bólingen baǵdarlama bolmaidy. Baǵdarlamany qoǵamdyq kólik alýǵa baǵyttap jatyrmyz", - dedi Qarabaev.
