Qazaqstandyqtar bir aida 94 kg altyn satyp alǵan

Sáýir aiynda el turǵyndary 2800-ge jýyq altyn quima satyp aldy, dep habarlaidy "Ult aqparat" Ulttyq bankke silteme jasap.

2021 jyldyń sáýir aiynda qazaqstandyqtar ekinshi deńgeili bankter men jekelegen banktik emes aiyrbastaý pýnktterinen jalpy salmaǵy 94,5 kg 2 767 quima satyp aldy. 

Ulttyq bank halyqqa tazartylǵan altyn quimalardy satý jáne satyp alý baǵdarlamasyn 2017 jyly qolǵa alǵan bolatyn. Baǵdarlama júzege asyryla bastaǵannan beri jalpy salmaǵy 1,88 tonna 52 967 altyn quima satyldy.

Altyn quimalardyń bes túri usynylǵan: 5, 10, 20, 50 jáne 100 g. Tazartylǵan altyn quimalardy satý jáne satyp alý baǵdarlamasy iske asyrylǵaly halyq arasynda eń kóp suranysqa ie bolǵany – 10 gramdyq quima. Jalpy satylymdaǵy onyń úlesi 31% – 16 074 dana. Odan keiin 100 gramdyq quima – 11 669 dana (22%) jáne 20 gramdyq quima – 11 275 dana (21%), 5 gramdyq quima – 8 072 dana (15%), 50 gramdyq quima – 5 877 dana (11%). Negizinen ólshengen quimalar Almaty, Nur-Sultan jáne Atyraý qalalarynda suranysqa ie.

Altyn quimalar senimdi investitsiialyq qural bola alady. Bankter men banktik emes aiyrbastaý pýnktteriniń klientke aqshasyn tólep, quimalardy «kúnbe-kún» satyp ala alatyn múmkindigi – altyn quimalar naryǵynyń ótimdiligin qamtamasyz etýde negizgi faktorǵa ainalyp otyr. Baǵdarlama iske qosylǵan ýaqyttan beri jalpy salmaǵy 4,2 kg ólshengen tek qana 147 quima satyp alýǵa qabyldandy. Bul, árine, altyn quimalardyń uzaq merzimdi investitsiialaý men jinaqtaý quraly bolyp tabylatynyna bailanysty.

Ár quima qorǵanys elementterimen (quimalardyń aina beti, mikrotekst jáne releftiń sheti), quimalardy mehanikalyq zaqymdanýdan qorǵaityn jáne pakettiń ashylǵan-ashylmaǵanyn tekserýdi jeńildetetin arnaiy qaptamada shyǵarylady. Qorǵanys qaptamasy, sonymen qatar, quimanyń sapa sertifikaty bola alady. Sondyqtan quimany saqtaǵanda muqiiat bolyp, oramany ashpaǵan jón.

Qazirgi ýaqytta altyn quimalardy Halyk Bank-te, Eýraziialyq bankte, Jýsan Bank-te, Bank TsentrKreditte, sondai-aq banktik emes aiyrbastaý pýnktterinde satyp alýǵa jáne satýǵa bolady.