Respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova halyq azyq-túlik taýarlaryna kóp qarajat jumsai bastaǵanyn málim etti, dep habarlaidy QazAqparat.
«Búgin biz ótken jylǵy biýdjettiń oryndalýy týraly esepti tyńdap jatyrmyz. Biraq osy jarty jyldyń ishinde ne ózgerdi? Bir jaǵynan, ótken jyly ekonomikanyń kópten kútken ósimi bolǵanyn aitamyz. Ekinshi jaǵynan, osy jarty jyldyń ishinde óte kúrdeli jaǵdailar ótip jatyr. Bizde de, álemde de sol. Sol sebepti, qazir men zańbuzýshylyqtardy talqylamas buryn júieli máselelerge toqtaiyn», - dedi Natalia Godýnova Parlament Senatynda 2019 jylǵy respýblikalyq biýdjettiń atqarylýy týraly esepti baiandaý kezinde.
Esep komitetiniń basshysy Prezident memlekettik baǵdarlamalardyń júzege asyrylýy men biýdjet qarajatyn paidalanýǵa qatysty jaýapkershilik pen eseptilikti qatańdatý kerektigin tapsyrǵanyn eske saldy.
«Depýtattardyń arqasynda mundai jaýapkershilik Biýdjet kodeksi men Ákimshilik quqyqbuzýshylyq jónindegi kodekske engizildi. Al 2019 jyldyń respýblikalyq biýdjeti qandai nátijemen igerildi? Birinshiden Qazaqstannyń Dúniejúzilik ekonomikalyq forýmyndaǵy jahandyq básekege qabilettilik reitingindegi makroekonomikalyq turaqtylyǵy 60-shy orynǵa deiin kóterilip, pozitsiiasyn jaqsarta tústi. Áitse de, munaiǵa táýeldilikti tómendetý tendentsiiasyna qol jetkizilgen joq. Keiingi on jyldyń ishinde óńdeý sektorynyń úlesi 11 paiyzdan aspai tur. Eksport qurylymynda mineraldy ónimderdiń úlesi 70 paiyzdan asyp ketti», - dedi ol.
Natalia Godýnova azamattardyń ál-aýqatyn jaqsartý máselesine de toqtaldy.
«Halyqtyń shynaiy tabysy 5,5 paiyzǵa ósti. Alaida, azyq-túlik taýarlaryna halyqtyń shyǵaratyn shyǵyny 50 paiyzǵa deiin jetti. Damyǵan elderde bul kórsetkish 10 paiyz kóleminde. Tipti Rese imen Belarýste bul kórsetkish shyǵynnyń úshten birine (28 paiyz jáne 32 paiyz) teń. Bul neni bildiredi? Halyq tabysynyń jartysy «jelinip», turǵyndarda óz jinaǵynyń kólemin arttyrýǵa múmkindik joq degen sóz», - dedi ol.
