Qazaqstandyqtar 2 tonnaǵa jýyq altyn quimasyn satyp alǵan

Mamyr aiynda qazaqstandyqtar jalpy salmaǵy 60,7 kg 1 813 quima satyp aldy. Bul týraly Ulttyq banktiń baspasóz qyzmeti habarlady.

Halyqqa tazartylǵan altyn quimalardy satý jáne satyp alý baǵdarlamasyn Ulttyq Bank 2017 jyly iske qosqan bolatyn. Baǵdarlama júzege asqaly jalpy salmaǵy 1,95 tonna 54 780 altyn quima satyldy. 

Altyn quimalardyń bes túri usynylady: 5, 10, 20, 50 jáne 100 g. Satyp alýshylar arasynda eń kóp suranysqa ie bolǵany – 10 gramdyq quima. Onyń jalpy satylymdaǵy úlesi 30% – 16 630 dana. Odan keiin 100 gramdyq quima – 12 128 dana (22%) jáne 20 gramdyq quima – 11 430 dana (21%), 5 gramdyq quima – 8 650 dana (16%), 50 gramdyq quima – 5 942 dana (11%). Negizinen, ólshengen quimalar Almaty, Nur-Sultan jáne Atyraý qalalarynda suranysqa ie.

Altyn quimalar senimdi investitsiialyq qural bola alady. Bankter men banktik emes aiyrbastaý pýnktteriniń klientke aqshasyn tólep, quimalardy «kúnbe-kún» satyp ala alatyn múmkindigi – altyn quimalar naryǵynyń ótimdiligin qamtamasyz etýde negizgi faktorǵa ainalyp otyr. Baǵdarlama iske qosylǵan ýaqyttan beri jalpy salmaǵy 5,8 kg ólshengen 177 quima ǵana keri satyp alýǵa qabyldandy. Bul, árine, altyn quimalardyń uzaq merzimdi investitsiialaý men jinaqtaý quraly bolyp tabylatynyna bailanysty.

Ár quima qorǵanys elementterimen (quimalardyń aina beti, mikrotekst jáne releftiń sheti), quimalardy mehanikalyq zaqymdanýdan qorǵaityn jáne pakettiń ashylǵan-ashylmaǵanyn tekserýdi jeńildetetin arnaiy qaptamamen shyǵarylady. Qorǵanys qaptamasy, sonymen qatar, quimanyń sapa sertifikaty bola alady. Sondyqtan quimany saqtaǵanda muqiiat bolyp, oramany ashpaǵan jón.

Qazirgi ýaqytta altyn quimalardy Halyk Bank-te, Eýraziialyq bankte, Jusan Bank-te, Bank TsentrKreditte, sondai-aq banktik emes aiyrbastaý pýnktterinde satyp alýǵa jáne satýǵa bolady.