Búkilálemdik karate federatsiiasy (WKF) Tokio Olimpiadasynda qazylyq jasaityn úmitkerlerdiń tizimin jasady. Resmi túrde usynylǵan 14 tóreshiniń qatarynda Qazaqstan karate federatsiiasynyń ókili Asqar Moldaǵali da bar dep habarlaidy "Ult aqparat" Olympic.kz saityna silteme jasap.
Asqar Moldaǵali kata men kýmiteden tolyq litsenziiaǵa ie halyqaralyq dárejedegi tóreshi. Ol óziniń jastyǵyna qaramastan, tájiribesi men kásibi sheberliginiń arqasynda álemdik federatsiianyń senimine kirgen.
«Árine, bul maǵan ǵana emes, ulttyq federatsiia men jalpy Qazaqstan sporty úshin jaǵymdy jańalyq. Olimpiada qarsańyndaǵy eki jyl tóreshiler úshin óte qiyn ótti. UOK, Konfederatsiia men Mádeniet jáne sport ministrligi, sondai-aq, ulttyq karate federatsiiasynyń qoldaýymen men múmkin bolǵan 25 litsenziialyq týrnirdiń bárine qatystym. Olimpiadalyq tsikl aiaqtalǵansha atqaratyn jumys kóp. Degenmen, men úmitti aqtaýǵa tyrysamyn», - deidi Asqar.
TMD elderiniń arasynan tek eki tóreshi ǵana tizimge ilingen. Olardyń biri Asqar Moldaǵali, ekinshisi Ázerbaijan ókili. «Qazaqstandyq tóreshiniń Olimpiada oiyndarynda qyzmet etetin qazylar qataryna engeni otandyq Federatsiianyń aýyzbirshiligi men eńbeginiń kórinisi. Bizdiń tóreshiler álemniń úzdikterimen bir deńgeide jumys istei alatynyn dáleldedi. Olimpiada qarsańynda qazaqstandyq komandanyń barlyq múshesi bir jaǵadan bas, bir jeńnen qol shyǵaryp, bir maqsat-múdde jolynda eńbek etti. Sondyqtan, álemdik uiymnan kelgen bul jańalyq bárimizdi qýantyp tastady», - deidi komanda bas bapkeri Jastalap Sanaýov.
