Keńeitilgen dopingtik tekserýden soń júldeden qaǵylǵan qazaqstandyq sportshylar Olimpiada medalin qaitara bastady, dep habarlaidy Olympic.kz.
Jaqynda qazaqstandyq aýyr atletter Svetlana Podobedova men Irina Nekrasova Olimpiada oiyndarynda ielengen júldelerin qaitardy. Svetlana London Olimpiadasynyń altynyn, Irina Beijiń Olimpiadasynyń kúmisin qaita tapsyrdy. Qazaqstan Ulttyq Olimpiada komiteti Olimpiadalyq hartiia erejelerin ustanyp, álemdik sporttaǵy Qazaqstan quramasynyń bedelin saqtaý maqsatynda sportshylarmen áńgime júrgizdi. Atletter túsinistik tanytyp, tórtjyldyq dodasynda ielengen medaldaryn qaitardy.
Aita ketelik, 2016 jyly Halyqaralyq Olimpiada komitetiniń Tártiptik komissiiasy (HOK) men Sporttyq arbitrajdy sot (CAS) qazaqstandyq jeti aýyr atlet pen eki balýannyń XXIX jáne XXX Olimpiada oiyndarynda jeńip alǵan (Beijiń-2008, London-2012) medaldaryn joqqa shyǵaryp, olardyń dopingke qarsy erejeni buzǵandaryn jariia etti. Sheshimge sáikes atletter jarystan shettetilip, nátijeleri joqqa shyǵaryldy jáne medaldardy qaitarýǵa mindetteldi.
Jaqyn arada qaitarylǵan medaldar Halyqaralyq Olimpiada komitetine joldanady. Júldesin áli kúnge deiin qaitarmaǵan sportshylarmen kelissóz júrgizýdi UOK odan ári jalǵastyrmaq.
