Beijiń Olimpiadasynda 1500 metrge jarysýdan qola júldeger atanǵan reseilik Semen Elistratov sońǵy bir jylda Qazaqstan komandasymen birge daiyndalyp, oqý-jattyǵý jiynyn ótkizýde. Olympic.kz saityna suhbat bergen sportshy qazaqstandyq áriptesterine alǵysyn bildirdi, dep habarlaidy "Ult aqparat".
Eske sala keteiik, Semenmen birge finalda jarysqan sportshylar qatarynda Ádil Ǵaliahmetov te bar.
«Bizge Olimpiada qarsańynda jaǵdai jasaǵany úshin qazaq halqyna tizemdi búgip, alǵys aitamyn. Qazaqstannyń Ulttyq Olimpiadalyq komitetine sheksiz rahmetimdi bildiremin. Qańtar aiynda elde tártipsizdik bastalǵan kezde bizdi stadionǵa jaýyp tastap, alańsyz daiyndalýymyzǵa bar kúshin saldy.
Short-trekten Qazaqstan komandasyna, Ádil, Denis, Abzalǵa, menimen birge jattyqqan barsha qyz-jigitterge alǵysym zor. Meniń jattyqtyrýshym Maksimov Andrei Ivanovich sońǵy bir jylda Qazaqstan komandasynyń keńesshi bapkeri qyzmetin atqarýda. Men de bapkerimniń sońynan keldim. Qazaqstandyq short-trekshiler alǵa basyp keledi.
Máselen, Ádil óziniń alǵashqy Olimpiadasynda finalǵa shyqty. Men oǵan únemi: «Ádil, jumys iste, eńbekten, sol kezde sen de tuǵyrǵa shyǵasyń», - dep jii aitatynmyn. Óitkeni, onyń kózderinen jas kezdegi ózimdi kóremin. Sportshylardyń bolashaǵy zor. Barsha qazaq halqyna úlken rahmet», - dedi Elistratov.
*Maksimov Andrei Ivanovich 2021 jyldyń 1 qańtarynan beri short-trekten Qazaqstan komandasynyń keńesshi bapkeri qyzmetin atqarýda. Ol - Olimpiada chempiony (2014) jáne Olimpiadanyń eki dúrkin qola júldegeri (2018,2022) Semen Elistratovtyń jeke jattyqtyrýshysy.
