Qazaqstannyń qos jetekshi arheology, professorlar Zeinolla Samashev pen Ábdesh Tóleýbaev Kembridj ýniversitetiniń oqytýshylary, stýdentteri jáne basqa da britaniialyq ozyq oqý oryndarynan kelgen ǵalymdar aldynda dáris oqydy, dep habarlaidy QazAqparat.
Professorlar lektsiia tyńdaýshylarǵa bizdiń dáýirimizge deiingi birinshi myńjyldyqta qazirgi Qazaqstannyń aýmaǵyn mekendegen ejelgi saqtardyń tarihy men mádenieti jáne qorǵandardan tabylǵan altyn artefaktiler týraly baiandady.
Aita ketý kerek, ǵalymdar sol jádigerlerdiń otany Berel, Shilikti jáne Eleke sazy atty qorym keshenderinde júrgizilgen arheologiialyq ekspeditsiialarǵa basshylyq etedi.
«Olar bizdiń tarihymyz týraly, jańa jádigerler jaily tolyq bilmeidi. Bilgenniń ózinde sonaý Keńes Odaǵy kezindegi derekterge súienedi. Al bizdiń búgin aityp jatqan oilarymyzdyń barlyǵy keiingi 5-10 jyldyń ishinde ashylyp jatqan ǵylymi jańalyqtarǵa negizdelgen. Sondyqtan olar úshin bul óte qyzyq», - deidi tarih ǵylymdarynyń doktory, professor Zeinolla Samashev.
«Jalpy saqtardyń tili jóninde, olardyń mádenietiniń sipaty jóninde áńgimeler aityldy. Búginge deiin saqtar Indo-Iran, Indarii dep atalǵanymen olardyń kóne túrkiler ekenin dáleldeitindei aiǵaqtar keltirdik», - deidi Ál-Farabi atyndaǵy Qazaq ulttyq ýniversiteti arheologiia kafedrasynyń professory Ábdesh Tóleýbaev.
«Gibridti» formatta, iaǵni offlain ári onlain ótken dáriske Kembridj stýdentterimen qatar álemniń túkpir-túkpirinen 200-den astam adam qatysty.
Arheologiia salasy boiynsha oqyp ári oqytyp júrgen jas ǵalymdar suraq qoiyp, tyń aqparattarmen sýsyndady.
«Metaldy óńdeýdiń sol kezdegi ádis-tásilderi týraly aitylǵan aqparattar óte-óte mazmundy boldy jáne ol ádisterdiń Qazaqstan boiynsha taralý tarihy da qyzyqtyrdy. Menińshe professorlar ǵylym úshin óte mańyzdy sharýa bitirip jatyr», - dep dáriske qatysýshylardyń biri, Kembridj ýniversitetiniń PhD stýdenti Kaira Kerker pikir bildirdi.
«Men UCL ýniversiteti janyndaǵy arheologiialyq materialdar institýtynyń lektorymyn. Búgin Londonnan Kembridjge arnaiylap kelip, professorlardyń ǵajap lektsiiasyn tyńdadym. Men búgin sol kezdegi bai-shonjarlar qaitys bolǵanda áielimen birge emes, analarymen, jienderimen birge jerlengeni týraly bildim. Ol dáýir týraly áli de kóp nárseden beihabar ekendigime kózim jetti», - deidi UCL ýniversitetiniń oqytýshysy Milena Radivovich.
Qazaqstandyq ǵalymdar dáristen bólek Kembridj ýniversitetiniń laboratoriialaryn da aralady.
Áriptesteriniń ǵylymi taldaý ádis-tásilderin kórip, tájiribe almasýǵa shaqyrdy.
Sondai-aq ýniversitettiń oqý josparymen tanysyp, stýdent jáne ustaz almasýǵa ýaǵdalasty.
Kembridj ýniversitetiniń ǵalymdaryn Qazaqstanǵa shaqyryp, ǵylymi ekspeditsiiaǵa birge qatysý jospary jasaldy.
