Foto: QR OAM
110 elden 50 myńnan astam oqýshy qatysqan Hiýstondaǵy FIRST Championship 2025 halyqaralyq injenerlik týrnirinde Qazaqstan quramasy úsh jas sanaty boiynsha rekordtyq nátije kórsetti, — dep habarlaidy Ult.kz QR Oqý-aǵartý ministrliginiń baspasóz qyzmetine silteme jasap.
Qazaqstan namysyn jeti komanda qorǵady. Joǵary sanatta (12–18 jas) Almaty qalasyndaǵy Nazarbaev Ziiatkerlik mektebiniń PID komandasy elimiz tarihynda tuńǵysh ret jarystyń finalyna ótip, eki marapat ielendi — Motivate Award Winner jáne Division Finalist Award.
Almatydaǵy Nazarbaev Ziiatkerlik mektebiniń CRISTABOL komandasy tehnikalyq jáne tehnikalyq emes daǵdylardyń úzdik úilesimi úshin beriletin eń bedeldi marapat — INSPIRE Award-ty jeńip aldy. Sana Team (Almatydaǵy Bilim-innovatsiia litseii) jáne Jeltoqsun (Qaraǵandy qalasyndaǵy «Murager» mektebi) komandalary robottar oiyny boiynsha 258 komandanyń ishinen TOP-20 qataryna endi.
Orta sanatta (10–16 jas) — FIRST LEGO League Challenge týrnirinde Astana qalasyndaǵy «Skillset» mektebiniń SKILLSET komandasy Champions Award nominatsiiasy boiynsha finalist atandy. Qaraǵandydaǵy «Murager» mektebiniń RASSLEXX komandasy Coopertition Award Winner marapatyn jeńip aldy.
Kishi sanatta (6–10 jas) — FIRST LEGO League Explore boiynsha Pavlodar qalasyndaǵy «Satýrn» mektebiniń ATLANTIS komandasy Team Model Award marapatyna ie boldy.
"FIRST Global Challenge chempionatynyń ereksheligi — bul jarysqa ártúrli jas deńgeiindegi birneshe komanda qatysady. Qazaqstan bul chempionatqa nebári bes jyldan beri qatysyp keledi. Soǵan qaramastan, ondaǵan jyldyq tájiribesi bar memlekettermen teń dárejede básekege túsýdemiz", — dedi USTEM Foundation qorynyń jetekshisi Asylbek Murzahmetov.
Eske sala keteiik, chempionattyń ulttyq uiymdastyrýshylary — QR Oqý-aǵartý ministrliginiń tikelei qoldaýymen «Daryn» respýblikalyq ǵylymi-praktikalyq ortalyǵy men «USTEM» qoǵamdyq qory.
