Foto: Gov.kz
QR Prezidenti Qasym-Jomart Toqaevtyń Pákistanǵa memlekettik sapary aiasynda Islamabad qalasynda Pákistannyń joǵary jáne joǵary oqý ornynan keiingi bilim berý uiymdarynyń bazasynda qazaqstandyq bilim berý jáne ǵylymi ortalyqtardyń saltanatty ashylý rásimi ótti, dep habarlaidy Ult.kz.
Saltanatty sharaǵa sondai-aq Pákistan Islam Respýblikasynyń Premer-ministri Shahbaz Sharif, QR Ǵylym jáne joǵary bilim ministri Saiasat Nurbek, Pákistannyń Bilim jáne kásiptik daiarlaý ministri Halid Mabýl Siddiki qatysty.
Ál-Farabi atyndaǵy Qazaq ulttyq ýniversitetiniń Ál-Farabi atyndaǵy ortalyǵy Qaid-i Azam ýniversitetiniń bazasynda ashyldy. 1993 jyly qurylǵan ortalyq 30 jyldan astam ýaqyt boiy farabitaný ǵylymyn damytyp, qazaq jáne shyǵys filosofiiasyn álemdik deńgeide nasihattap keledi. Ortalyqtyń tolyqqandy jumys isteýi úshin qajetti materialdyq-tehnikalyq baza qalyptastyrylyp, oqý jáne ǵylymi aýditoriialar, kompiýterlik synyptar men keńse bólmeleri tolyq jabdyqtalǵan.
Ortalyqta sheteldik azamattarǵa arnalǵan qazaq tili kýrstary, sondai-aq Qazaqstannyń mádeni murasyn zertteýge baǵyttalǵan mádeni-aǵartýshylyq is-sharalar, seminarlar men ǵylymi konferentsiialar uiymdastyrylady. Sonymen qatar ortalyq seriktes elderdiń jetekshi bilim berý jáne ǵylymi uiymdarymen áriptestik bailanystardy nyǵaitýǵa baǵyttalǵan.
Q.I. Sátbaev atyndaǵy Qazaq ulttyq zertteý tehnikalyq ýniversitetiniń Qanysh Sátbaev atyndaǵy ǵylymi-bilim berý ortalyǵy Ulttyq ǵylym jáne tehnologiialar ýniversitetiniń (NUST) bazasynda ashyldy. Ortalyq birlesken ǵylymi jáne bilim berý jobalaryn iske asyrýǵa, stýdentter men oqytýshylar almasýyn damytýǵa, sondai-aq qazaqstandyq ǵylymdy halyqaralyq deńgeide ilgeriletýge arnalǵan alańǵa ainalady. Ortalyq kórnekti qazaqstandyq geolog, akademik Qanysh Sátbaevtyń ǵylymi murasyna arnalǵan.
Satbayev Center stýdentter men zertteýshilerdiń birlesip jumys isteýine, ideialar almasýyna, halyqaralyq ǵylymi jobalarǵa qatysýyna, PolytechOnline platformasy men zamanaýi injenerlik kýrstarǵa qol jetkizýine múmkindik beretin zamanaýi keńistik retinde quryldy.
Ortalyq Aziia islam bilimi, mádenieti jáne órkenietine baǵyttalǵan Iasaýi zertteý ortalyǵy Islamabadtaǵy Halyqaralyq islam ýniversitetiniń Islam zertteýleri institýtynyń bazasynda ashyldy. Ortalyq islam jáne óńirlik zertteýler salasyndaǵy birlesken ǵylymi zertteýler júrgizýge, ǵylymi pikirtalastar uiymdastyrýǵa jáne akademiialyq dialogty damytýǵa arnalǵan intellektýaldyq platforma retinde jumys isteidi.
Aldaǵy kezeńde qazaqstandyq ǵalymdardyń Pákistanǵa ǵylymi saparlaryn uiymdastyrý, pákistandyq mamandardyń Túrkistan qalasynda dárister oqýy, birlesken zertteýler júrgizý jáne akademiialyq tájiribe almasý josparlanyp otyr.
