Egis alqaptaryn qurǵaqshylyqtan saqtandyrǵan sharýashylyqtarǵa 491 million teńgeniń saqtandyrý tólemi berildi. Bul týraly búgin «Aýyl sharýashylyǵyn qarjylai qoldaý qory» AQ baspasóz qyzmeti habarlady.
Baspasóz málimetterine qaraǵanda, biyl iske qosylǵan jańa saqtandyrý júiesi úiden shyqpai-aq saqtandyrý shartyn jasasýǵa múmkindik berdi. Sonymen qatar, ósimdik sharýashylyǵymen ainalysatyn fermerler memlekettik sýbsidiianyń kómegi arqyly saqtandyrý shyǵyndarynyń jartysyn ótep aldy.
Aita keteiik, biyl jyl basynan beri agroónerkásip kesheninde erikti saqtandyrý júiesi jumys istei bastady. Bul júieniń operatory – «QazAgro» UBH-niń enshiles kompaniiasy - Aýyl sharýashylyǵyn qarjylai qoldaý qory.
Saqtandyrý shartyn jasasýdan bastap saqtandyrý jaǵdaiyn tirkeýge deiingi protsess WWW.QOLDAU.KZ platformasyndaǵy «Agroinsurance» aqparattyq servisinde júzege asyrylady.
Aýyl sharýashylyǵy taýarlaryn óndirýshilerdi yntalandyrý, táýekelderdi azaitý jáne salaǵa investorlar tartý úshin saqtandyrý syiaqylaryn sýbsidiialaityn memlekettik qoldaý qarastyrylǵan. Shart jasasqan soń fermer saqtandyrý syiaqysy somasynyń tek 50%-yn tóleidi, qalǵan bóligi memlekettik qoldaý esebinen tólenedi.
Topyraqtaǵy ylǵal deńgeii spýtniktiń kómegimen anyqtalyp, monitoring avtomatty túrde júrgiziledi. Saqtandyrý jaǵdaiy týraly habarlama fermerdiń platformadaǵy jeke kabinetine keledi. Sodan keiin ol saqtandyrý tólemine ótinish jiberedi.
«Biyl maýsym aiynda 60 sharýashylyq egis alqaptaryn qurǵaqshylyqtan saqtandyrdy. Saqtandyrý syiaqysy 199 mln teńgeni qurady. Onyń jartysy memlekettik sýbsidiianyń kómegimen tólendi. Nátijesinde 47 sharýashylyq jalpy somasy 491 mln teńge bolatyn saqtandyrý tólemine qol jetkizdi», - deidi «Aýyl sharýashylyǵyn qarjylai qoldaý qory» AQ caqtandyrý departamentiniń direktory Ásel Ramazanova.
Osy júieniń igiligin kórgenderdiń biri – eginshilikpen ainalysatyn qojalyqtyń basshysy Qanat Álmuhamedov. Ol bidai, arpa, júgeri, kúnbaǵys ósiredi. Aqmola, Qostanai, Soltústik Qazaqstan oblystarynda egistik alqaptary bar. Fermer erikti saqtandyrý júiesi óte yńǵaily ekenin aitady.
«Biyl 8 315 gektar jerimizdi saqtandyrdyq, 22,5 million teńge tóledik. Onyń jartysyn memleket sýbsidiialady. Bizdiń aimaqtarda 60 kúnge deiin jaýyn-shashyn bolmady. Nátijesinde, aqparattyq júie arqyly ótinish berip, 86,5 million teńge kóleminde ótemaqy aldyq. Erikti saqtandyrý júiesi óte yńǵaily. Barlyq operatsiia onlain formatta ótedi», - deidi sharýa qojalyǵynyń basshysy Qanat Álmuhamedov.
Saqtandyrý naryǵyn odan ári damyta túsý úshin WWW.QOLDAU.KZ elektrondy platformasyn jetildirip, qyzmet kórsetý qoljetimdiligin arttyrý josparlanýda.
Barlyq týyndaǵan suraqtar boiynsha «Aýyl sharýashylyǵyn qarjylai qoldaý qory» AQ-na +7 701 543 3744 telefon nómiri boiynsha habarlasýǵa bolady.
