5-aqpanda qazaqstandyq birinshi astyq Qytaidyń Lianiýngan porty arqyly Vetnamnyń Hoshimin portyna jiberildi, - dep habarlaidy "Ult aqparat" "Qazaqstan temir joly" UK» AQ baspasóz qyzmetine silteme jasap.
Baspasóz qyzmetindegilerdiń málimetinshe, "QTJ" UK" AQ enshiles kásiporny "KTZ Express AQ Lianiýngan qalasyndaǵy "Qytai-qazaqstan halyqaralyq logistikalyq kompaniiasy" JShS-men birlesip, qanatqaqty joba retinde osy baǵdardy tańdady.
Osylaisha, Qazaqstannyń Jaltyr stantsiiasynan tuńǵysh ret 32 konteinermen 700 tonna qazaqstandyq astyq Lianiýngan porty arqyly Hoshimin portyna jóneltildi.
Sondai-aq, Lianiýngan portynda qazaqstandyq astyqty jiberýge qatysty saltanatty shara ótkizildi. Oǵan "Lianiýngan" porty MK" JShS direktorlar keńesiniń tóraǵasy Din Jýi qatysyp, qytai tarapynyń Qazaqstan aýmaǵy arqyly kólik dálizin damytýǵa, qazaqstandyq ónimderdi Qytai aýmaǵy arqyly Ońtústik –Shyǵys Aziia elderine shyǵarýǵa qoldaý kórsetetindigin atap ótti. Osy dáliz arqyly Qazaqstanǵa Ońtústik Shyǵys Aziia elderiniń túrli ónimderin jetkizý de josparlanyp otyr.
Qazaqstandyq ónimdi Lianiýngan portynyń áleýetin paidalana otyryp júzege asyrý Jibek joly ekonomikalyq beldeýin damytýdy kózdeidi.
Lianiýngan teńiz porty Qytaidaǵy temirjol baǵdarymen tikelei bailanysqan álemdegi iri porttardyń birinen sanalady.
Lianiýngan teńiz portyndaǵy kólik-logistikalyq terminaly "QTJ" UK" AQ enshiles kásiporny - "KTZ Express" AQ mýltimodaldyq kompaniiasymen "Lianiýngan porty halyqaralyq logistikalyq kompaniiasy" JShS birlesken kásiporny bolyp tabylady.
