2021 jyldyń qarashasynda Ádilet ministrligi tólemder somasyn qaita qaraýǵa zańdy negiz joq ekeni týraly qorytyndy shyǵarǵan, óitkeni zań normalary ony qabyldaǵanǵa deiin týyndaǵan quqyqtyq qatynastarǵa qoldanylmaidy. Sol jyldyń jeltoqsanynda Mádeniet jáne sport ministrliginiń Sport jáne mádeniet isteri komiteti Denis Ýlanovqa tólemderdi qaita qaraýǵa negiz joq degen jaýap joldaǵan. Osyǵan bailanysty ziltemirshi Mádeniet jáne sport ministrligin tólem somasyn qaita qaraýǵa májbúrleý týraly sotqa shaǵym túsirgen.
Sot málimetinshe, "Dene shynyqtyrý jáne sport týraly" zańnyń 45-babynda Halyqaralyq Olimpiada komiteti joǵary sport júldesin bergen kezde halyqaralyq sport jarystarynyń chempiondary men júldegerlerin aqshalai kótermeleý somalary qaita qaralatyny kórsetilgen. Bul ereje 2019 jyldyń 13 jeltoqsanynan bastap qoldanysqa engizilgen.
Mádeniet jáne sport ministrliginiń tólemder somasyn qaita qaraýdan bas tartý negizderinde zań normasynyń keri kúshi joqtyǵy, sondyqtan daýly quqyqtyq qatynastarǵa qoldanýǵa bolmaityny kórsetilgen. "Quqyqtyq aktiler týraly" zańǵa sáikes, normativtik quqyqtyq akti zań normasy azamattardyń jaǵdaiyn jaqsartýǵa baǵyttalǵan jaǵdaida, ol kúshine engenge deiin týyndaǵan qatynastarǵa da taralady. Qoldanystaǵy zań tólemder somasyn qaita qaraý mindetin qarastyrady.
"Nur-Sultan qalasynyń mamandandyrylǵan aýdanaralyq ákimshilik sotynyń 2022 jylǵy 10 naýryzdaǵy qaýlysy boiynsha talap aryz qanaǵattandyryldy, tólemder somasyn qaita qaraýdan bas tartý zańsyz dep tanyldy. Sot Mádeniet jáne sport ministrligine tólemder somasyn qaita qaraýdy mindettedi", - delingen habarlamada.
Sheshim zańdy kúshine engen joq.
Eske salaiyq, Denis Ulanov 2016 jyly Rio-de-Janeiroda (Braziliia) ótken Olimpiada oiyndarynda aýyr atletikadan 85 kelige deiingi salmaq dárejesinde tórtinshi bolǵan. Sportshy julqi kóterýde 175 kelini, serpe kóterýde 215 kelini (barlyǵy 390 keli) baǵyndyryp, Gabriel Synkreianmen teń túsken. Alaida onyń qarsylasy jeńilirek bolǵandyqtan Olimpiadanyń qola júldegeri atanǵan, al Ulanov 4 oryndy ielendi.
Alaida, keiin Gabriel Synkreian doping qoldanǵany úshin diskvalifikatsiialandy jáne qola medal Ulanovqa resmi túrde berilgen. 2018 jyldyń qarashasynda Ashhabadta ótken álem chempionatynda Halyqaralyq aýyr atletika federatsiiasynyń IWF prezidenti Tamash Aian kópten kútken júldeni Ulanovqa tapsyrǵan.
