Foto: videodan skrin
Marǵulan ýniversitetiniń arheologtary men stýdentteri Pavlodar oblysynyń Baianaýyl aýdanynda saq dáýirine tiesili sirek kezdesetin eki qola pyshaq tapty. Qundy jádigerler Toraiǵyr kóliniń mańyndaǵy saq qorǵanynda jazǵy dalalyq tájiribe kezinde anyqtaldy, dep habarlaidy Ult.kz.
«Biyl biz «Toraiǵyr-6» atty belgili eskertkishte qazba jumystaryn júrgizip, tas tóbeniń shyńyn zerttedik. Nátijesinde «Toraiǵyr-7» jańa qorǵan anyqtaldy. Eki qorǵandy qazý barysynda biz saq dáýiriniń erte kezeńine jatatyn qola pyshaqtardy taptyq», – dedi Marǵulan ýniversitetiniń arheologiialyq qorlarynyń bas saqtaýshysy Elena Týsheva.
Zertteýshilerdiń aitýynsha, bul Pavlodar oblysynda tabylǵan eń kóne qola buiymdardyń biri.
«Pyshaqtar ejelgi tehnologiia ádisi arqyly qoladan quiylǵan. Biraq stilistikalyq jaǵynan erte temir dáýirine jatady. Bul aimaqta damyǵan metallýrgiialyq tehnologiialar men turaqty mádeni bailanystardyń bolǵanyn rastaidy», – dedi Elena Týsheva.
Sondai-aq arheologtar bul jerden Tasmola mádenieti ókilderiniń qaldyqtaryn tapqan.
«Qańqa-súiekter jaqsy saqtalǵan. Bul jynys, jas jáne antropologiialyq sipattamalardy anyqtaýǵa múmkindik berdi. Al tómengi qabatty tazartqan kezde biz kóne Andronov mádenietine jatatyn qabirlerge tap boldyq», – dedi «Tarih» baǵdarlamasynyń stýdenti Angelina Grishenko.
Aita keteiik, Marǵulan ýniversiteti Baianaýyl aimaǵynda 10 jyldan astam ýaqyt boiy zertteýler júrgizip keledi. Búginde oqý ordasy Baianaýyldaǵy negizgi arheologiialyq eskertkishterdiń saqtalýyn qamtamasyz etedi.
