Almatydaǵy Respýblikalyq fizika-matematika mektebinde ishek infektsiiasyn juqtyrǵandar sany 48-ge jetti. Barlyq naýqas aýrýhanaǵa jatqyzylǵan, jaǵdailary turaqty. Bul týraly Densaýlyq saqtaý ministrligi málimdedi, dep habarlaidy ult.kz.
Sanitariialyq-epidemiologiialyq baqylaý komitetiniń mamandary mekteptiń tamaqtaný blogyn tekserip, birqatar zańbuzýshylyqty anyqtaǵan. Atap aitqanda, azyq-túlikti saqtaý, daiyn taǵamdardyń táýliktik synamalaryn alý jáne tamaqtanýdy uiymdastyrý talaptary buzylǵan.
Tekserý barysynda «Master Food» JShS-niń tamaqtaný blogyna qatysty bes qaýly shyǵarylǵan. Olar mektep pen ashananyń qyzmetin ýaqytsha toqtatýdy, jekelegen taǵamdardy satýǵa tyiym salýdy jáne qajetti qujattary joq sút ónimderin alyp qoiýdy qamtidy.
Internat ǵimaratynda dezinfektsiia júrgizilgen. Naýqastarmen bailanysta bolǵan adamdar meditsinalyq baqylaýǵa alyndy. Balalardyń bir bóligi profilaktikalyq maqsatta internatta oqshaýlanǵan.
Infektsiianyń naqty sebebin anyqtaý úshin sý men azyq-túlik ónimderinen synamalar alynyp, ashana qyzmetkerleri tekserilgen. Zerthanalyq zertteýler áli jalǵasyp jatyr.
Ministrliktiń málimetinshe, balalardyń arasynda reanimatsiialyq kómekti qajet etetin naýqas joq. Tekserý materialdary tiisti protsestik sheshim qabyldaý úshin quqyq qorǵaý organdaryna jiberilgen.
Qazir jaǵdai Densaýlyq saqtaý ministrliginiń baqylaýynda. Epidemiologiialyq tergep-tekserý jalǵasyp jatyr.
Aita keteiik, Almatyda RFMM mektebiniń 47 oqýshysy ishek infektsiiasymen aýrýhanaǵa tústi.
