Elordada ótip jatqan Qazaqstandyq-amerikalyq biznes forým aiasynda birqatar kelisim rásimdeldi, dep habarlaidy QazAqparat tilshisi.
Forým barysynda aýyl sharýashylyǵy, infraqurylym, aviaqurylys, tsifrlandyrý jáne aqparattyq tehnologiialar salalaryn qamtityn 8 ekijaqty qujatqa qol qoiyldy. Atalǵan qujatty rásimdeýshiler qatarynda amerikalyq taraptan Valmont, MasterCard, Honeywell jáne Sierra Nevada Corporation kompaniialarynyń ókilderi boldy.
«Ekonomikany keńeitýde tabysty jetistikter bar ekenin bilemiz. Muny Halyqaralyq valiýta qory da rastap otyr. Ol 2016-2019 jyldardaǵy ekonomika ósimin atap ótti. Ekonomikanyń shikizattyq emes sektoryna qatysty aitar bolsaq, onda biz ónimderdi ártaraptandyrý maqsatyna qol jetkizip qaldyq. 2018 jyly syrtqy saýda 20 paiyzǵa ósti. Biz saýda-sattyqty 100 mlrd dollarǵa jetkizýge niettimiz. Tolyqtai alǵanda, bizdiń ekonomikamyz da, saýda-sattyǵymyz da sheteldik áriptesterdiń qyzyǵýshylyǵyn týǵyzyp otyr. Sondai-aq, tikelei shetel investitsiiasynyń quiylýy 15 paiyzdan asyp ketti», - dep atap ótti QR Premer-Ministriniń birinshi orynbasary Asqar Mamin.
Aita keteiik, forým jumysyna AQSh Saýda ministri Ýilbýr Ross pen QR Premer-Ministriniń birinshi orynbasary Asqar Mamin, 20-dan astam amerikalyq kompaniianyń basshylary, qazaqstandyq biznes ókilderi, ministrlikter men vedomstvo basshylary qatysty.
Esterińizge sala ketsek, AQSh-tyń Saýda ministri Ýilbýr Ross elimizge sapary aiasynda Elbasy Nursultan Nazarbaevpen kezdesip, sonymen birge QR Premer-Ministri Baqytjan Saǵyntaevpen ekonomikalyq yntymaqtastyq máselelerin talqylady.
