«KazakhInvest» Ulttyq kompaniiasy» AQ basqarma tóraǵasy mindetin atqarýshy Meiirjan Máikenov taiaýda Qazaqstanda júzege asyrylatyn investitsiialyq jobalar jaiynda aityp berdi, dep habarlaidy QazAqparat.
«Jalpy alǵanda, búginde «KazakhInvest» ulttyq kompaniiasy jumysynda 158 joba qamtylǵan. Óńirlik turǵyda jobalardyń kóbisi Atyraý, Aqmola, Aqtóbe, Almaty oblystarynda jáne Astana qalasynda ornalasqan. Jobalardyń jalpy quny 49 mlrd dollarǵa baǵalanyp otyr. Atalǵan 158 jobanyń arasynda belsendi túrde pysyqtalyp jatqandarynyń sany 76-ǵa (20,4 mlrd dollar) jetti, iaǵni bul jobalarda áriptester, qarjylyq model, biznes jospar, tehnikalyq-ekonomikalyq negizdeme eskerilgen. Osy oraida bular tolyqtai júzege asyrýǵa daiyn tur», - dep toqtaldy ol Senatta ótken el ekonomikasyna investitsiia tartý taqyrybyndaǵy dóńgelek ústelde.
Onyń sózine qaraǵanda, bul 76 jobanyń ishinde transulttyq kompaniialardyń qatysýymen 34-i qamtylǵan. Atalǵan jobalardyń arasynda 26-sy qytailyq, 20-sy eýropalyq elderdiń investitsiialaryna baǵdarlanǵan. Al salalyq nyshan boiynsha jobalardyń kóbisi himiialyq, munai-himiialyq, farmatsevtikalyq baǵyttarda iske asyrýǵa negizdelgen, iaǵni bul 19 joba 10 mlrd dollarǵa baǵalanyp otyr. Taý-ken ári metallýrgiialyq saladaǵy 18 joba 5 mlrd dollardy qurady. Sonymen qatar basymdyqqa ie agroónerkásiptik keshendegi 12 jobanyń quny 500 mln dollarǵa jetti.
«2017 jyly júrgizilen jumystyń nátijesinde 5 joba aiasynda qurylys jumystary bastaldy. Budan bólek, 2018 jylǵa josparda 16 jobany iske qosý kózdelgen. Olardyń arasynda Niderlandynyń Farm Frites transulttyq korporatsiiasy jobasyna toqtalsam, olar kartop ónimderin óndirýge mamandandyrylǵan. Bul kompaniia barsha álem boiynsha McDonalds júiesine resmi ónim jetkizýshi bolyp tabylady. Farm Frites ieliginde kartop óndirýde iri alty zaýyty bar. Endi jetinshi zaýyt Almaty oblysynda salynady. Zaýyttyń qýattylyǵy 70 myń tonnany quraidy. Atap aitqanda, barsha ónimniń 80 paiyzy reseilik naryqqa eksporttalatyn bolady», - dedi Meiirjan Máikenov.
