Ortalyq kommýnikatsiialar qyzmetinde ótken brifingide QR Bas prokýratýrasy Qylmystyq qýdalaý qyzmetiniń bastyǵy Serik Shalabaev elde bolǵan tártipsizdikterdiń tolyq hronologiiasyn usyndy, dep habarlaidy QazAqparat.
Serik Shalabaevtyń aitýynsha, suiytylǵan gaz baǵasynyń kúrt ósýine bailanysty narazylyq Mańǵystaý oblysynda 2022 jyldyń alǵashqy kúninde bastalǵan.
«Birinshi qańtarda Mańǵystaý oblysynyń Jańaózen qalasynda saǵat 17.20-da qala ákimdiginiń janynda qala turǵyndary jinaldy. Suiytylǵan gaz baǵasyn tómendetý talabymen el basshylyǵynyń atyna beineótinish jazǵan soń sol kúni saǵat 18:00-de adamdar tarady. Quqyq qorǵaý organdary qarý qoldanǵan joq.
Ekinshi qańtarda Mańǵystaý oblysynda saǵat 11.00-den bastap ákimdikterge avtoparkterge, meshitke jaqyn jerde suiytylǵan gaz baǵasyn tómendetý talabymen oblys turǵyndarynyń sanktsiiasyz jiyndary baiqaldy. Kún ishinde narazylyq bildirýshiler shamamen birneshe júz adamdy qurady. Jańaózen qalasynda aktsiialarǵa qatysýshylar ishki avtojoldardy japty. Quqyq qorǵaý organdary qarý qoldanǵan joq», - dedi ol.
Aitýynsha, úshinshi qańtarda Mańǵystaý oblysynyń turǵyndaryn qoldaý maqsatynda elimizdiń basqa 7 óńirinde beibit mitingiler bastalǵan.
«Tórtinshi qańtarda mitingiler jalǵasyp, adamdardyń sanktsiiasyz jappai jinalystary baiqalǵan óńirler sany 11-ge deiin ósti. Qatysýshylar sany 38 myńǵa deiin kúrt ósti. Almaty jáne Shymkent qalalarynda qarýly shabýyldar, órteý sonyń ishinde qyzmettik avtokólikterdi órteý bastaldy. Almaty qalasynda «Almaty Arena» sport kesheniniń janynda jinalǵan 5 myńǵa jýyq adam qala ákimdiginiń ǵimaratyna baryp, politsiia qyzmetkerlerimen qaqtyǵysqa tústi», - deidi bas prokýratýra ókili.
Bas prokýratýra qylmystyq qýdalaý qyzmetiniń bastyǵy osynyń saldarynan 6 politsiia avtokóligi órtenip, Ulttyq ulannyń 5 áskeri qyzmetshisi jáne 15 politsiia qyzmetkeri jaraqat alǵanyn aitady.
«Shymkent qalasynda 21 avtokólik zaqymdaldy. Osy kúnnen bastap qyzmetkerler men ákimshilik ǵimarttarǵa shabýyldardy qaitarý maqsatynda quqyq qorǵaý organdary adam ómirine qaýip keltirmeitin arnaiy quraldardy paidalana bastady.
Besinshi qańtarda oiran salý men ǵimarattardy basyp alý 11 aimaqta jalǵasty. Olarǵa qatysýshylar sany 50 myńǵa jetti.
Tórtinshi qańtardan besinshi qańtarǵa qaraǵan túni terrorister Almaty qalasy ákimdiginiń ǵimaraty men Almaty halyqaralyq áýejaiyn basyp aldy. Sondai-aq, banditter órt sóndirý bólimin, Almaty qalalyq politsiia departamentin, Áýzeov jáne Jetisý aýdandyq politsiia basqarmalaryn basyp alýǵa áreket jasady, 7 qarý-jaraq dúkenine basyp kirdi. Ulttyq qaýipsizdik komiteti shekara qyzmetiniń 2 «Kamaz» avtokóligine politsiia departamentiniń 2 qyzmettik avtokóligine, qala ákimdiginiń «Nur Otan» partiiasynyń ǵimarattaryna, 4 saýda ortalyǵyna, bank bólimshelerine órt qoiyldy. Almatydaǵy qarýly shabýyldarǵa qatysýshylar sany 20 myńnan asty», - dep eske aldy Serik Shalabaev.
Onyń sózinshe, Qyzylorda qalasynda shabýylshylar 9 avtokólikti órtedi, 1 jaýyngerdi kólikpen qaǵyp óltirgen.
«Áskeri qyzmetshilerden belgisiz adamdar toby avtomat pen eki tapanshany tartyp aldy. Taldyqorǵan qalasynda shabýylshylar ákimdik, politsiia jáne Ulttyq qaýipsizdik komiteti departamentiniń ǵimarattaryn basyp aldy. Qalada qarýly toptar júrdi. Sondai-aq, kúsh qoldaný arqyly Aqtóbe, Atyraý, Qyzylorda, Mańǵystaý jáne Jambyl oblystarynda oblystyq ákimdikteriniń ǵimarattary basyp alyndy. Azamattardyń qaýipsizdigine tóngen qaýip-qaterge bailanysty Prezidenttiń Jarlyqtarymen eldiń ár aimaǵynda Tótenshe jaǵdailar engizilip, kommendanttyq saǵat belgilendi. Terroristerdiń áreketterin úilestirýdi joqqa shyǵarý jáne olardyń bailanys quraldaryn padalanýyn jol bermeý maqsatynda internetti paidalaný shekteldi», - dedi Bas prokýratýra qylmystyq qýdalaý qyzmetiniń bastyǵy.
Sondai-aq, ol qarýly toptarǵa qarsy quqyq qorǵaýshylar men áskeriler tarapynan qashan oq atyla bastaǵanyn naqtylady.
«Altynshy qańtarda Qaýipsizdik keńesiniń sheshimimen elimizde antiterroristik operatsiiany ótkizý jariialandy. Onyń negizgi maqsaty – ulttyq qaýipsizdikke tónetin qaterlerdi joiý jáne azamattardyń ómiri men múlkin qorǵaý bolyp tabylady. Tek osy kúnnen bastap quqyq qorǵaý organdary men Qarýly kúshter terroristerdi joiý úshin qarý qoldana bastady. Almatyda «Kóktóbe» telemunarasy men Ulttyq qaýipsizdik komiteti Shekara qyzmetiniń akademiiasyn terroristerdiń basyp alýyna jol berilmedi.
Ujymdyq qaýpizdik keńesiniń sheshimimen bitimgerlik operatsiia júrgizý úshin Qazaqstanǵa UQShU kúshteriniń kontingentteri jiberildi», - dedi Bas prokýratýra ókili.
Aitýynsha, 7 qańtarda beibit narazylyq sharalary Mańǵystaý, Atyraý, Aqtóbe, Qaraǵandy jáne Shyǵys Qazaqstan oblystarynda jalǵasqan.
Al 8 qańtarda jaǵdai birtindep turaqtanyp, azamattardyń ruqsatsyz jinalýy toqtatylǵan.
