Foto: Ult.kz
Memleket basshysy Qasym-Jomart Toqaevtyń Prezident bolyp sailanǵanyna 6 jyl toldy. Osy oraida Qazaqstan Respýblikasynyń Prezidenti janyndaǵy QSZI-dyń Almaty ókildiginde «Qazaqstandaǵy reformalar: negizgi jetistikter men damý baǵyttary» taqyrybynda talqylaý ótti, – dep habarlaidy Ult.kz.
KISI GPS alańynda jetekshi sarapshylar, saiasattanýshylar, ǵylymi qaýymdastyq jáne qoǵamdyq uiymdardyń ókilderi saiasi jańǵyrýdyń negizgi jetistikterin, sońǵy úsh jylda elimizdegi saiasi, ekonomikalyq jáne áleýmettik reformalar salasynda júrgizilip jatqan júieli jumystardy talqylady. Máselen, Almaty Azamattyq aliansynyń tóraǵasy Qaiyrjan Ábdihalyqov eldegi qoǵamdyq keńesterdegi jańashyldyqtardy atap ótti.
Foto: Ult.kz
Qaiyrjan Ábdihalyqov, Almaty Azamattyq aliansynyń tóraǵasy:
«Iá, Prezident sailanǵaly Azamattyq qoǵamǵa da kóńil bóline bastady. Máselen, bizde qoǵamdyq keńesterdiń eki deńgeii bar. Ol lokaldy-jergilikti qoǵamdyq keńester, qalada bolsyn, aýdanda bolsyn, sol jerdegi ártúrli qoǵamdyq bastamalardy jáne biýdjetti baqylaidy. Ekinshi deńgei – ortalyq deńgei. Ol ministrlikterdiń kóbinde jáne agenttiktiń janynda qoǵamdyq keńesteri bar. Onyń róline keletin bolsaq, qazirgi tańda zań júzinde mynadai másele bar: Qoǵamdyq keńestiń músheleri tenderlik komissiiaǵa kirýge qaqyly. Ol barlyq jerde joq dep aita almaimyn, árine bar. Qazirgi tańda memlekettik tapsyrystarǵa qanshama tender júrgizedi. Mysaly, bizde qoǵamdyq keńestik músheleriniń sany – 39, bul negizgi jumys emes, qoǵamdyq jumys. Memlekettik mekemeler bizde ashyq, biraq ózgerister engizý kerek. Qoǵamdyq baqylaýdyń zańyna sonyń negizinde tek qana qoǵamdyq keńestiń músheleri emes, sol qoǵamdyq birlestikterdiń jetekshileri de osy tenderlik komissiiaǵa kirýge qaqyly bolýy kerek. Óitkeni olardyń sany kóbirek, olar ózderiniń maqsatty toptaryn jaqsy biledi».
Sarapshylar qysqa merzim ishinde eldiń saiasi qurylymynda eleýli ózgerister bolǵanyn, sonyń ishinde saiasi júieniń liberalizatsiiasy, Parlament róliniń kúsheiýi jáne bilikti ortalyqsyzdandyrý úrdisin atap ótti. Sonymen qatar, Memleket basshysynyń ádebiet pen mádenietke degen erekshe yqylasy da nazarǵa alyndy.
Foto: Ult.kz
Beknur Qisyqov, Almaty qalasy Qoǵamdyq keńesiniń múshesi:
«Rasynda, mańyzdy máselelerdi kóterip otyrmyz. Prezident Qasym-Jomart Toqaev Prezident bolyp sailanǵaly ádebiet, mádenietke de erekshe nazar aýdaryla bastady. Keshe ótken Quryltaida qatty unaǵany, kitap jaily. Iaǵni 23 aqpannan bastap bizde "Kitap kúni" bolady. Qazir erekshe kún bolady dep belgilendi. Ózim birneshe kitaptyń avtory bolǵandyqtan, maǵan bul mańyzdy. Qazir mádeniet túsip bara jatyr, áleýmettik jelilerde de mádeniet qalyptaspady. Al mádeniet kitaptan bastalady. Sondyqtan Memleket basshysynyń bastamasyn qýana qoldap otyrmyn».
Sondai-aq sot salasyń reformalary (mysaly, Konstitýtsiialyq Sot qurý, azamattarǵa óz quqyqtaryn tikelei qorǵaýǵa múmkindik berý), ólim jazasyna tyiym salý jáne sybailas jemqorlyqqa qarsy is-qimyl sharalary da qozǵaldy. Sonymen qatar, Prezident Qasym-Jomart Toqaev ǵylymǵa da erekshe kóńil bólip, jas ǵalymdardy qoldaýda, ǵylymǵa qarjy bólýde mańyzdy ister atqarǵan. Bul týraly Ulttyq ǵylym akademiiasynyń Bilim jáne áleýmettik damý ortalyǵy basshysynyń mindetin atqarýshy baiandap berdi.
Foto: Ult.kz
Kúltai Ádilova, Ulttyq ǵylym akademiiasynyń Bilim jáne áleýmettik damý ortalyǵy basshysynyń mindetin atqarýshy:
«QR Prezidenti janyndaǵy Ulttyq ǵylym akademiiasy jańa statýspen qurylyp, qyzmet atqaryp jatyr. Negizi ǵylymi qaýymdastyqtyń, onyń ishinde jas ǵalymdardyń qazirgi qoǵamdaǵy týyndap jatqan ózekti áleýmettik problemalarǵa áseri úlken bolatyny sózsiz. Negizi Ulttyq ǵylym akademiiasyna jańa mártebe berildi. Oǵan eń joǵary ǵylymi uiym mártebesi berildi. Qazirgi kúni qurylym biraz ózgerip, negizgi baǵyttary boiynsha bólimshelerge bólinip jatyr. Bul jerdegi maqsat, barlyq óńirlerdegi joǵary oqý oryndarynyń ǵylymi institýttarynan belgili ǵalymdardy qosyp, belsende jumys atqaramyz. Sonymen qatar, bizde jas ǵalymdar keńesi óte belsendi jumys atqarady. Qoǵamda bolyp jatqan negizgi máseleler bizdiń ǵalymdardyń zertteý taqyryptary, iaǵni olar sol máselelrdi kóterip júr. Biz Ulttyq ǵylym akademiiasynyń atynan Ulttyq quryltaiǵa da usynys beremiz. Memleket tarapynan granttyq qarjylandyrý, mega granttar berilip jatyr».
Sondai-aq atalǵan jiynda reformalardyń tiimdiligi, aldaǵy damý joldary, onyń ishinde Ulttyq quryltaida usynylǵan Ishki saiasat tujyrymdamasy, kommertsiialyq emes uiymdarǵa (ÚEU) qatysty zańnamalyq ózgerister, shaǵyn jáne orta biznesti qoldaý, tsifrlandyrý baǵdarlamalary men memlekettiń jalpy bolashaqtaǵy damýy talqylandy.
Mańyzdy taqyryptardy talqylaýǵa Almaty Azamattyq aliansynyń tóraǵasy Qaiyrjan Ábdihalyqov, Almaty qalasy Qoǵamdyq keńesiniń múshesi Beknur Kisykov, «Strategiia» áleýmettik-saiasi zertteýler ortalyǵy» qoǵamdyq qorynyń jetekshisi Gúlmira Ileýova, QR Prezidenti janyndaǵy QR Memlekettik basqarý akademiiasynyń Almaty qalasy boiynsha filialynyń direktory Ainýr Idrisova, UAO «Narhoz ýniversitetiniń» ǵalym jáne kommertsializatsiialaý jónindegi vitse-prezidenti Janar Arǵynbaeva, saiasi sholýshy Zamir Qarajanov, QR Prezidenti janyndaǵy QSZI Halyqaralyq qaýipsizdik bóliminiń bas ǵylymi qyzmetkeri Erbolat Seilehanov, QR Prezidenti janyndaǵy QSZI Saiasi zertteýler bóliminiń basshysy Janar Sanhaeva jáne QSZI-dyń Almaty qalasyndaǵy Ókildiginiń jetekshisi Ásel Nazarbetova jáne basqa da sarapshylar qatysty.
Aqbota Musabekqyzy
