Kollaj: Ulysmedia.kz
Qazaqstanda zeinetaqynyń ortasha mólsheri 121 myń teńgege jýyqtaidy.
Eńbek jáne halyqty áleýmettik qorǵaý ministrliginiń aqparatynsha, jyl basynan beri respýblikalyq biýdjetten 824,3 mlrd teńge zeinetaqy tólendi, sonyń ishinde bazalyq zeinetaqy – 253,1 mlrd teńge, yntymaqty zeinetaqy – 571,2 mlrd teńge.
2023 jylǵy 1 sáýirdegi jaǵdai boiynsha elimizde 2 mln 297 myń zeinetker bar.
"2023 jylǵy 1 sáýirdegi jaǵdai boiynsha jiyntyq zeinetaqynyń ortasha mólsheri 120 798 teńgeni qurady, onyń ishinde yntymaqty zeinetaqy mólsheri – 82 953 teńge, bazalyq zeinetaqy – 37 845 teńge boldy", - dep málimdedi vedomstvo.
Aita keteri, 2018 jylǵy 1 shildeden bastap memlekettik bazalyq zeinetaqy tólemi zeinetaqy júiesindegi ótilin eskere otyryp, ár alýshyǵa jeke taǵaiyndalady.
Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder zeinetaqy júiesindegi eńbek ótiline qosylady.
Eger azamattyń zeinetaqy júiesindegi ótili 10 jyl nemese odan az bolsa, sondai-aq múlde joq bolsa, bazalyq zeinetaqy eń tómengi kúnkóris deńgeiiniń 60%-na teń bolady. Sodan keiin 10 jyldan asqan ár jyl úshin onyń mólsheri 2%-ǵa artady. Al eger sizdiń ótilińiz 20 jyl bolsa, bazalyq zeinetaqy tómengi kúnkóris deńgeiiniń 80 %-yn quraidy. Eńbek ótili 30 jyl nemese odan kóp bolsa, kúnkóris deńgeiiniń eń joǵarǵy mólsherinde iaǵni 100% belgilenedi.
Eger bir ai ishinde mindetti zeinetaqy jarnalary Biryńǵai jinaqtaýshy zeinetaqy qoryna birneshe ret aýdarylsa, jinaqtaýshy júiege qatysý merzimi bir aidy quraidy.
Osylaisha mindetti zeinetaqy jarnalary neǵurlym turaqty jáne tolyq kólemde aýdarylsa, zeinet jasyna jetkende bazalyq zeinetaqynyń mólsheri soǵurlym kóp bolady.
Al azamattyń jasyna bailanysty zeinetaqy mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńdegi ortasha ailyq tabysyna bailanysty bolady.
