Qazaqstanda kinoteatrlar nege ashylmai jatyr? Bul suraqqa OKQ-da ótken baspasóz máslihatynda Mádeniet jáne sport ministri Aqtoty Raiymqulova jaýap berdi, dep habarlaidy "Ult aqparat".
«Elimizdiń bas memlekettik sanitarlyq dárigeri men Densaýlyq saqtaý ministrligi qazirgi epidemiologiialyq jaǵdaiǵa bailanysty kinoteatrlardy ashýǵa áli de erte dep sanaidy. Biz epidemiologiialyq jaǵdai jaqsaryp, kinoteatrlardyń ashylýynan úmittenip otyrmyz. Kinoteatrlardyń óte úlken shyǵyndarǵa ushyrap, jumys oryndarynyń qysqaryp jatqanynan habarymyz bar. Biraq álemdegi jaǵdai osyndai. Kinoteatrlardy ashqan basqa elder kóp ótpei qaita jabýǵa májbúr boldy», - dedi Aqtoty Raiymqulova.
Ministr kinoteatrlardyń qarjylyq shyǵynyn jabý úshin beriletin jeńildikter týraly aityp ótti.
«Kórermen qazir saq. Pandemiiaǵa deiingidei kinoteatrǵa kóp kelmeýi múmkin. Sondyqtan biz búgin kinoteatrlardyń jaǵdaiyn túsinemiz. Ulttyq ekonomika ministrligimen birge kinoteatrlarǵa beriletin artyqshylyqtar men salyqtyq jeńildikter týraly normalardy ázirledik. Bul olardy jyl sońyna deiin jeke tabys salyǵynan, áleýmettik salyqtan, sondai-aq mindetti zeinetaqy tólemderinen jáne áleýmettik meditsinalyq saqtandyrý tólemderinen bosatady. Olar sondai-aq ShOB-ti tekserýden bosatylady, iaǵni memleket olardyń shyǵynyn barynsha azaitý úshin shara qoldanady. Biraq, ókinishke qarai, sanitarlyq dárigerdiń sheshimi ázirge kinoteatr ashýǵa múmkindik bermeidi», - dedi ministr.
Aqtoty Raiymqulova keltirgen málimetke sáikes, pandemiia saldarynan kinoteatrlar 20 mlrd teńge shyǵynǵa batqan.
