Deldaldar kómir baǵasyn úsh, tipti tórt ese kóbeitip jatyr, dep habarlaidy "Ult aqparat" energyprom.kz aqparat kózine silteme jasap.
«Deldaldar jylý maýsymy bastalmai jatyp iske kiristi: olardyń yqpal etýimen kómir baǵasy 3, keide tipti 4 ese, tonnasyna 3,5–5,5 myńnan 14–22 myń teńgege deiin kóterilip barady», - delingen habarlamada.
Qazaqstanda qazan aiynda jylý maýsymy bastalady. Ortalyq jylý júiesine qosylǵan qalalardaǵy turǵyn úilerde tarif 14 paiyzǵa tómendep, 1 Gkal úshin 3440 teńgeni quraǵan. Al aimaqtarda úilerdi jylytý kómir men otynǵa, nemese tabiǵi gaz tasymaldaityn taratý jelilerine táýeldi.
1 tonna kómirdiń respýblikalyq deńgeide ortasha baǵasy 12,4 myń teńgeni qurap otyr. Bul baǵa ótken jyldyń qyrkúiegimen salystyrǵanda 3,8 paiyzǵa ǵana arzan. Otynnyń bir tekshe metri 8,9 paiyzǵa - 6,5 myń teńgege deiin qymbattaǵan. Tabiǵi gazǵa qol jetimdi aimaqtar úshin gazdyń baǵasy 1 tekshe metr úshin 1,1 paiyzǵa - 18,7 teńgege deiin tómendedi.
«Kómir baǵasyn belgileý áli de deldaldardyń qolynda tur. Deldaldardyń ózin deldaldyq qurylymdar retteitindei saýda birjaǵa aýyssa da, bul ózgeris kómektesetin emes. Sonymen, óndirýshi kompaniialar bastapqyda kómirdiń tonnasyn 3,5–5,5 myń teńgege satsa, bul baǵa búkil deldaldar tizbeginen ótip baryp, túpkilikti tutynýshy úshin 14-22 myń teńge aralyǵynda satylady», - dep tolyqtyrady energyprom.kz.
QR UEM Básekelestikti qorǵaý jáne damytý komitetiniń tóraǵasy Rústem Ahmetovtiń aitýynsha, kómir óndirýshiler men olarǵa enshiles deldal kompaniialardyń kelisip alý jaǵdaiy da anyqtalǵan. Iaǵni, taýar birjasynda 566 myń tonna kómir bar bolǵany 6 tasymaldaýshyǵa bólinip berilgen.
Statistika komitetiniń málimetine sensek, kómirdiń eń joǵary baǵasy Oralda (bir tonna úshin 18,5 myń teńge), Qyzylordada (14,1 myń teńge) jáne Almatyda (14 myń teńge) baiqalǵan. Otynnyń eń joǵary baǵasy Nur-Sultanda: 1 tekshe metrge 12,7 myń teńge. Sondai-aq, elordada kómir baǵasy tonnasyna 12,3 myń teńgeni qurap otyr.
