Qazaqstanda 4122 shtattyq orynǵa dárigerler qajet. Bul týraly QR DSM respýblikalyq densaýlyq saqtaýdy damytý ortalyǵynyń bas direktory Qanat Tósekbaev málimdedi, dep habarlaidy QazAqparat.
«Biyl 15 shildede 5201 shtattyq orynda medinitsalyq kadr tapshylyǵy bolǵan edi. Ásirese Qostanai oblysyna mamandar asa qajet boldy, 624 shtattyq oryn bos turdy. Jas mamandardy óńirlerge jibergen soń kadr tapshylyǵy máselesi jaqsaryp keledi. Máselen, 10 qyrkúiektegi jaǵdai boiynsha 1079 orynǵa maman kelip, kadr tapshylyǵy 4122 orynǵa deiin azaidy», - dedi Q. Tósekbaev Ortalyq kommýnikatsiialar ortalyǵynda ótken onlain brifingte.
Onyń aitýynsha, Qazaqstanda anesteziolog-reanimatolog, terapevt, jalpy praktikalyq dáriger, zerthanashy dáriger, akýsher-ginekolog, infektsiialyq dárigerler jetispei jatyr. Ortasha meditsinalyq qyzmetkerler arasynda 8583 bos oryn bar.
«Resmi derek boiynsha, qazir densaýlyq saqtaý júiesinde 253 883 qyzmetker jumys isteidi. Onyń ishinde 74046 dáriger, 179 myńnan astam orta meditsinalyq qyzmetker bar. 16 myńnan astam dáriger jeke meditsinalyq uiymdarda jumys isteidi. Búginde elimizde 9464 jalpy praktikalyq dáriger bar. Olar jalpy dárigerlik personaldyń 13,2 paiyzyn quraidy. Jalpy praktikalyq dárigerlerdiń eń kóbi Túrkistan oblysynda (1205 maman) jumys isteidi. Sonymen birge, terapevter men pediatrlar sany basym», - deidi Q. Tósekbaev.
Ótken jylmen salystyrǵanda dárigerlik kadr 1,5 paiyzǵa, ortasha meditsinalyq qyzmetkerler – 2,6 paiyzǵa artqan.
«Meditsinalyq kadrmen qamtý deńgeiine kelsek, Nur-Sultan men Almaty qalalarynda qamtý kórsetkishi joǵary. Al dáriger jetispeitin óńirler arasynda Aqmola, Almaty, Atyraý, Jambyl, Qostanai jáne Túrkistan oblystary bar. Dárigermen qamtý kórsetkishi óńirler arasynda 24,5-75,5 túrlenedi. Iaǵni, bul óńirler arasynda resýrs bólýde teńgerim joqtyǵyn kórsetedi. Eń aldymen bul meditsinalyq uiymdar jelisin damytý, meditsinalyq qyzmetkerlerge jaǵdai jasaý syndy birneshe faktorlarmen bailanysty. Qala men aýyl arasynda da kadrlyq resýrstyń disbalansy edáýir baiqaldy. Pandemiia men koronavirýs infektsiiasy bul baǵytta da ózekti másele baryn kórsetti», - deidi spiker.
