Qazaqstanda iri qara, usaq mal, jylqy men túie sany kóbeiip, eshki men qus sany azaiǵan. Bul týraly energyprom.kz habarlady.
Energyprom.kz aqparat kóziniń zertteýine súiensek, jalpy eldegi mal sharýashylyqtary jyl basynan beri tórt aidyń ishinde 657 mlrd teńgeniń ónimin shyǵarǵan. Bul – bir jyl burynǵy kórsetkishten 2,3 paiyzǵa artyq.
«2020 jyldyń qańtar-sáýir ailarynda mal sharýashylyǵynyń jalpy ishki ónimi 657,1 mlrd teńgege jetti. Eń joǵary kórsetkishter Almaty oblysynda tirkelip, tórt aidyń ishinde onda 106,4 mlrd teńgeniń ónimi óndirilgen. Mal sharýashylyǵynan edáýir paida tapqan úzdik úsh óńirge Túrkistan oblysy (90,8 mlrd tg, +2,8%) men Shyǵys Qazaqstan oblysy (81,9 mlrd tg, +1,6%) engen.
Al Úkimettiń habarlaýynsha Qazaqstannyń mal sharýashylyǵynda turaqty ósim saqtalyp otyr. Osy jyldyń qorytyndysy boiynsha salanyń jalpy ishki ónimin 2,6 trln teńgege, iri qara basyn 7,8 millionǵa, usaq maldyń sanyn 17,5 millionǵa jetkizý josparlanyp otyr.
Aldaǵy ýaqytta qosymsha 105 myń tonna qus etin óndiretin qosymsha qus fabrikasy salynady. Sonymen qatar qazirgi qus fabrikalarynyń da óndirisin arttyrý kózdelgen. Bul rette eldiń óz qajettiligine basa mán beriletinin atap ótý kerek.
«1 mamyrdaǵy kórsetkish boiynsha eldegi iri qara sany 8,8 mln basqa jetti. Bir jyl burynǵy kórsetkishten 4,1 paiyzǵa ósip otyr. Al qoi sany 22,3 millilonǵa (+2,7%), jylqy 3,2 millionǵa (+7,6%), túie sany 243,2 myńǵa (+4,1%), shoshqa sany 933,4 myńǵa (bir jyl burynǵy kórsetkishten +1,6%) jetken. Al eshki sany kerisinshe 3 mln basqa (-1,4%) azaiyp, qus sany 45,2 millionǵa (-0,8%) kemigen» delingen habarlamada.
