QR Qoǵamdyq damý ministri Darhan Káletaev jastar arasynda óz-ózine qol jumsaityndar sany azaiyp kele jatqanyn málim etti, dep habarlaidy QazAqparat.
«Statistika boiynsha álemde jyl saiyn 18 jasqa deiin erte ana atanǵan 15 million qyz tirkeledi. Onyń ishinde 40 paiyzdan astamy túsik jasatady. Bizde jyl saiyn osyndai jaǵdaiǵa 15-18 jas aralyǵyndaǵy 5 myńnan astam qyz tap bolady», - dedi ministr elordadaǵy «Investitsiia - jastarǵa. Eshkimdi tys qaldyrmaiyq» halyqaralyq konferentsiiasynda.
Sonymen qatar, Darhan Káletaev álemdegi jáne Qazaqstandaǵy jastar arasyndaǵy sýitsid máselesine toqtaldy.
«Dúniejújilik densaýlyq saqtaý uiymynyń málimetinshe, jyl saiyn 67 myńǵa jýyq jasóspirim ózine zaqym keltirý saldarynan kóz jumady. Sýitsid jasóspirimder arasyndaǵy ólim-jitim boiynsha aldyńǵy oryndaǵy sebepterdiń biri bolyp otyr. Statistika komitetiniń deregine súiensek, Qazaqstanda 14-ten 28 jasqa deiingiler arasynda óz-ózine qol jumsaý oqiǵalary azaiyp keledi. Iaǵni 2015 jyldaǵy 970-ten 2017 jyly 818-ge deiin tómendedi. Degenmen de bul kórsetkish áli de joǵary», - dedi vedomstvo basshysy.
Ministr búginde jastar men olardyń múddelerine memleket saiasatynda erekshe kóńil bólinip turǵanyn atap ótti. Elimizde Jastar jáne otbasy isteri jónindegi komiteti jumys istep jatyr, sondai-aq barlyq óńirlerde ókiletti memorgandar jasaqtalǵan.
Eki kúnge jalǵasatyn halyqaralyq konferentsiia barysynda jastardy qoldaýǵa arnalǵan usynystar ázirlenedi. Sharaǵa 35 elden júzden astam sheteldik meiman qatysýda. Qazaqstan tarapynan Parlament Májilisiniń depýtattary, ortalyq atqarýshy organdardyń basshylary, sarapshylar men jastar uiymdarynyń ókilderi atsalysyp jatyr.
Budan buryn habarlanǵandai, Májilis tóraǵasy Nurlan Nyǵmatýlin Elbasy Joldaýy aiasynda jastardyń rólin arttyrýǵa jańa serpin beriletinin atap ótti.
Aita keteiik, Elbasy biylǵy Joldaýynda 2019 jyldy Jastar jyly dep jariialady.
