QR Prezidentiniń kómekshisi Erlan Qarin Memleket basshysynyń jańa bastamalary aiasynda jaqyn arada birqatar basqa da zań jobalary ázirlenetinin aitty, dep habarlaidy «Ult aqparat».
«Ulttyq keńestiń júzege asyrylǵan bastamalary portfelinde taǵy bir zań bar. Búgin Memleket basshysy «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgerister men tolyqtyrý engizý týraly» Qazaqstan Respýblikasynyń Zańyna qol qoidy. Jańa normalarǵa sáikes, qazaqstandyq júrgizýshiler endi ózimen birge tek jeke kýáligin alyp júrse jetkilikti», - dep jazdy E. Qarin Telegram kanalynda.
Onyń aitýynsha, 2019 jyldyń 20 jeltoqsanynda Ulttyq keńestiń ekinshi otyrysynda Prezident Qasym-Jomart Toqaev alǵash ret osy bastamany jariialaǵan bolatyn. Osy arqyly búgingi zań Ulttyq qoǵamdyq senim keńesiniń aiasynda qabyldanǵan 12-shi qujat.
«Qazirgi kezde taǵy 7 zań jobasy qarastyrýdyń túrli satysynda tur. Osyǵan deiin jariialanǵan jańa bastamalar aiasynda jaqyn arada birqatar basqa da zań jobalary ázirlenedi», - dedi Erlan Qarin.
Eske sala keteiik, 21 qańtarda Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgerister men tolyqtyrý engizý týraly» Zańy eki oqylymda qaralyp, qabyldandy. Zańda Qazaqstan Respýblikasynda berilgen júrgizýshi kýáligi men kólik quralyn tirkeý týraly kýálikti ózimen birge alyp júrýdi talap etetin normany qoldanystaǵy zańnamadan alyp tastaý eskerilgen. Iaǵni, avtokólik iesin politsiia toqtatqan kezde, ol jeke kýáligin usynyp, sol jeke kýálikpen politsiia qyzmetkeri planshet arqyly elektrondyq bazada onyń qajetti qujattary boiynsha tekserý júrgize alady.
