Qazaqstanda jumyrtqa óndirisi 8%-ǵa qysqardy. 2021 jylǵy qańtarda el qalalarynyń bazarlary men dúkenderinde 10 jumyrtqanyń quny 396 teńgeni qurady.
Bul bir jyl burynǵy kórsetkishpen salystyrǵanda 30,4%-ǵa artyq. QR iri qalalary men megapolisteriniń ishinde jumyrtqalar Almaty, Nur-Sultan jáne Atyraý turǵyndary úshin eń qymbat, al Taraz turǵyndary úshin eń arzan bolyp otyr, dep habarlaidy Energyprom.kz.
Sondai-aq, Habar24 telearnasy habarlaǵandai, Qazaqstan qus ósirýshiler odaǵy prezidentiniń málimetterine sáikes, qus tumaýynyń taralýyna bailanysty óndiristiń quldyraýy jáne saladaǵy baǵanyń ósýi baiqalady.
Odaq basshysynyń pikirinshe, baǵanyń ósýi úshin deldaldar jaýap beredi, sonyń saldarynan 30%-dan 50%-ǵa deiin ósip jatyr. Qus ósirýshilerdiń ózderi de otandyq asyl tuqymdy bazanyń tapshylyǵyna tap bolyp otyr.
Elge ákelingen taýyqtar jyl saiyn fermerlerge qymbatqa túsýde. Kóptegen kásiporynǵa óndiristi keńeitýge ǵana emes, jarty jyldyń ishinde tórtten bir esege qymbattaǵan jem-shóp satyp alýǵa da ainalym qarajaty jetpeidi, dep málimdeidi Qazaqstan qus ósirýshiler odaǵy.
2020 jyly elimizde 5 mlrd. jumyrtqa óndirildi. Bul bir jyl burynǵyǵa qaraǵanda 8,4% -ǵa az. Óńirler arasynda óndiris boiynsha Almaty (994,8 mln dana, bir jyl ishinde 5,8%-ǵa azaiǵan), Aqmola (804,4 mln dana, bir jyl ishinde 6,5%-ǵa azaiǵan) jáne Qaraǵandy (664,3 mln dana, bir jyl ishinde 11,2%-ǵa azaiǵan) oblystary kósh bastap tur.
Jumyrtqaǵa suranysty (eksport pen ishki naryqta satýdy) on bir aidyń qorytyndysy boiynsha jergilikti kompaniialar 96,6%-ǵa qamtamasyz etken. Bul rette eksporttyń úlesi qolda bar resýrstardyń tek 4,2% qurady, al bir jyl buryn 30,4% bolǵan edi. Tek 204,9 million jumyrtqa syrtqy naryqqa jiberildi. Bul 2019 jyldyń sáikes kezeńimen salystyrǵanda 7,9 ese az.
Bir jyldan az ýaqyt ishinde ishki naryqta 4,7 milliard jumyrtqa satyldy, jyldyq ósim qarqyny 25,7%-dy qurady. On bir aida eldiń ár turǵynyna ortasha eseppen 247,2 jumyrtqadan keledi. Ortasha alǵanda árbir qazaqstandyq úsh kúnde eki jumyrtqadan jeidi, iaǵni kúnine bir jumyrtqadan az jeidi.
