Qazaqstannyń joǵarǵy oqý oryndarynda bilim berý modeli ózgeredi, onda zertteý jasaýǵa basa mán beriledi. Bul týraly QR Ǵylym jáne joǵary bilim ministri Saiasat Nurbek aitty, dep habarlaidy QazAqparat.
«Qazir otandyq ǵylymnyń negizgi problemasy – ǵylymi zertteýlerimiz, júzden astam ǵylymi-zertteý ortalyqtarymyz, ǵylymi institýttarymyz JOO-ǵa negizdelgen tehnopark pen ǵylymi zertteýler, ónerkásip, óndiris, naqty kompaniialardyń talaptarymen, óndiristik protsestermen ushtastyrylmaǵan. Iaǵni, ǵylym óz betimen, óndiris óz betimen, ekonomika óz betimen júr. Sondyqtan ǵylym salasynda da bizdiń negizgi maqsatymyz – osy eki dúnieni ushtastyrý. Otandastarymyzǵa qarapaiym suraq qoisaq – qazaqstandyq ǵylymǵa senesiz be dep surasaq, ókinishke orai, joq degen jaýap alamyz. Sol senimdi qaitarýymyz kerek. Ǵalymdardy jańa keiipkerler retinde olardyń mártebesin qaitarýymyz kerek», - dedi Saiasat Nurbek QR Prezidenti Teleradiokesheniniń «3 suraq» baǵdarlamasynda.
Sonymen birge, Ǵylym ministri JOO-lardy zertteý jáne qoldanbaly zertteý ortalyqtaryna ainaldyrý qajettigin aitty.
«Nege deseńiz, qarapaiym adam mektepte 11 jyl oqidy, bul – pedagogikalyq model. Al ýniversitetke kelgende pedagogikalyq emes, zertteý modelimen jumys isteý kerek. Iaǵni onda zertteýdi, izdenýdi, syni oilaýdy, aqparatpen jumys isteýdi úiretip, eńbek naryǵyna daiyndaýymyz kerek. Al bizde 70-80 paiyz ýniversitette – sol dáris, sol synyp, taqtaǵa shyǵarý, úi jumysyn tekserý. Sondyqtan bul model ózgerýi kerek. Kelesi jyldan bastap, biz eń myqty JOO negizinde arnaiy ortalyqtar ashamyz. Iaǵni 120 JOO-ny bir sátte, bir jylda kóshirý qiynǵa túsedi, ondai resýrsymyz joq. Biraq biz pilotty túrde ár óńirde 2-3 bilim oshtaqtarynan bastap, zertteý modeline kóshirýdi bastaimyz. Iaǵni, mazmuny, ádistemesi, bilim berý modeli ózgerip, endi JOO-lar qoldanbaly ǵylymmen ainalysatyn modelge kóshedi. Kelesi jyldan bastap, alty óńirlik ýniversitet negizinde tehnoparkter ashamyz, iaǵni sol JOO-da bilim bergen professorlar, magistranttar, doktoranttar, bakalavrlar ózderi kúndelikti bilim alyp qana qoimai, zertteýmen de ainalysýy kerek. Tehnopark arqyly, patent arqyly sol zertteýlerdi qoldanbaly zertteýlerge ainaldyryp, jergilikti biznes, jergilikti óndiris oshaqtarynyń problemalaryn sheshýge baǵyttalýy kerek», - dep túsindirdi Saiasat Nurbek.
