QR Energetika ministri Nurlan Noǵaev Ortalyq kommýnikatsiialar qyzmetinde Memleket basshysynyń Joldaýyn júzege asyrý aiasynda ministrlik júrgizip jatqan jumystar týraly aitty, dep habarlaidy QazAqparat.
Nurlan Noǵaev qazirgi kezde ministrlik munai-gaz sektory naryǵyndaǵy jergilikti qamtý úlesin ulǵaitýǵa qabiletti eki bastamany iske asyryp jatqanyn, olardy jaqyn arada iske asyrý josparlanǵanyn jetkizdi.
Onyń aitýynsha, birinshiden, Jergilikti qamtýdy damytýdyń tikelei investitsiialar qoryn qurý eskerilgen. «Shevron» kompaniiasy Respýblika aldyndaǵy óziniń qaita investitsiialaý mindettemeleri aiasynda 248 mln AQSh dollar mólsherinde jergilikti qamtýdy damytýdy josparlap otyr. Investitsiialar tehnologiia men IT, bazalyq taýarlar shyǵarý jáne munai-gaz sektory men qorshaǵan ortany qorǵaýǵa arnalǵan jabdyqtardyń jekelegen túrlerin qurastyrý boiynsha úsh baǵytqa salynady.
Taratylǵan málimetterge qaraǵanda, 10 jyl ishinde Qor qyzmetiniń Qazaqstan Respýblikasynyń jalpy ishki ónimine oń áseri shamamen 642 mln dollardy (nemese shamamen 270 mlrd teńge) quraidy dep josparlanyp otyr.
Qazirgi ýaqytta importtalatyn taýarlar men qyzmetterdiń belgili bir bóligi el ishinde óndiriledi dep josparlanýda, bul importty 86 mln dollarǵa nemese 36 mlrd teńgege azaitýǵa alyp keledi.
Ekinshiden, munai-gaz mashinasyn jasaý men servisti damytý halyqaralyq ortalyǵyn qurylmaq.
Atalǵan Ortalyq jumysynyń maqsaty - jańa óndirister men qyzmet servistik ortalyqtar ashý. Sonymen qatar, jumys istep turǵan otandyq taýar óndirýshiler men servistik kompaniialardyń múmkindikterin keńeitý arqyly Qazaqstannyń munai-gaz salasy úshin, iaǵni úsh operatordyń (NKOK, KPO, TShO) qajettigi úshin taýarlar men kórsetiletin qyzmetter óndirisin oqshaýlaý eskerilgen.
