"Samuryq-Qazyna", "QazMunaiGaz" jáne Frantsiianyń Total Eren kompaniiasy Qazaqstannyń ońtústik-shyǵysynda jel parkin salady, - dep habarlaidy "Ult aqparat" Aqordaǵa silteme jasap.
Qazaqstan Respýblikasynyń Energetika ministrligi men Frantsiianyń Eýropa jáne Syrtqy ister ministrligi arasynda Jambyl oblysynda qýaty 1 GVt bolatyn jel elektr stantsiiasyn salý máseleleri týraly Úkimetaralyq kelisimge qol qoiyldy. Qol qoiý rásimine Memleket basshysy qatysty.
Jel elektr stantsiiasy 2026-2027 jyldary paidalanýǵa beriledi, bul bizdiń elimizdegi JEK nysandarynyń jiyntyq energiia óndirisin shamamen 50 paiyzǵa arttyrady.
Jobanyń boljamdy quny - 1,9 milliard dollar.
Qazaqstanda alǵash ret jel elektr stantsiiasy elektr qýatyn jinaqtaý júiesimen tolyqtyrylady. Bul jobanyń biregeiligin kórsetedi. Atalǵan bastama jańartylatyn energiia óndirisiniń tabiǵi qubylmalylyǵyn retteýge, artyq elektr energiiasyn jinaqtaýǵa jáne energiia jelisiniń turaqtylyǵyn qamtamasyz etýge múmkindik beredi.
