Foto: ashyq derekkóz
Qazaqstanda jeke meditsinalyq jáne bilim berý uiymdaryn qarjylandyrý mehanizmderi túbegeili qaita qaralady, dep habarlaidy Ult.kz.
Bul týraly Premer-ministrdiń orynbasary – mádeniet jáne aqparat ministri Aida Balaeva Úkimet otyrysynda málimdedi.
Vitse-premerdiń aitýynsha, Memleket basshysynyń Ulttyq quryltaidyń V otyrysynda bergen tapsyrmalary aiasynda bilim berý men densaýlyq saqtaý salalaryn qarjylandyrýdyń ádil ári tiimdi júiesin qalyptastyrý kózdelip otyr. Qazirgi tańda bilim berý salasynda jekemenshik mektepterdi tsifrlyq esepke alý, negizgi protsesterdi avtomattandyrý jáne biýdjetteý júiesimen sinhrondaý baǵytynda pilottyq joba iske qosylǵan. Nátijesinde 785 jekemenshik mektep tolyq tsifrlandyrylǵan.
Biýdjet qarajatyn maqsatty paidalaný úshin jańa jekemenshik mektepterge memlekettik tapsyrys ornalastyrýǵa moratorii engiziledi. Endi memlekettik qarjylandyrý óńirde naqty qajettilik bar jekemenshik mektepterge ǵana baǵyttalady. Bul rette memlekettik mektepterdiń jetispeýshiligi, úsh aýysymdy oqytýdy joiý jáne apatty mektepterdiń ornyna jańa bilim berý nysandaryn salý basymdyq retinde aiqyndalǵan.
Sonymen qatar bilim salasyna jeke investitsiia tartý maqsatynda memlekettik tapsyryssyz, tek investitsiialyq shyǵyndy óteý tetigi saqtalady. Oqý-aǵartý ministrligi jekemenshik mektepterge litsenziiadan keiingi baqylaýdy kúsheitip, bilim sapasy, pedagog kadrlarmen qamtylý jáne balalardyń qaýipsizdigine basa mán bermek.
Al densaýlyq saqtaý salasynda meditsinalyq kómekti josparlaý halyqtyń naqty qajettilikteri, demografiialyq jáne kóshi-qon derekteri negizinde júrgiziledi. Qarjylandyrý eń tiimdi memlekettik jáne senimdi jeke meditsinalyq uiymdarǵa baǵyttalmaq. Qosarlanǵan tólemder men jalǵan eseptiń aldyn alý úshin biryńǵai tsifrlyq baqylaý júiesi engiziledi. Patsienttermen keri bailanys mobildi qosymsha arqyly júzege asady.
Budan bólek, sapany baqylaý kúsheitilip, litsenziialaý talaptary qatańdatylady. Mindetti áleýmettik meditsinalyq saqtandyrý júiesi Qarjy ministrliginiń quzyretine berildi. Qazirgi ýaqytta quqyq qorǵaý organdarymen birlesip, «Zań jáne tártip» qaǵidatyna sai tekserýler júrgizilip jatyr.
Úkimet jeke meditsina jáne bilim berý uiymdaryn qarjylandyrý tetikterin qaita qaraýǵa arnalǵan is-sharalar josparyn bekitken. Atalǵan ózgerister qarjylandyrý júiesiniń ashyqtyǵy men tiimdiligin arttyrýǵa jáne halyqqa kórsetiletin qyzmet sapasyn jaqsartýǵa baǵyttalǵan.
